Durmiendo en bancos, caxeros, coches, ruines o debaxo una ponte, siendo atacaos o espulsaos de los sos míseres abellugos, vulnerables, albentestate ante la indiferencia xeneralizada, son asgaya los homes y muyeres que sobreviven na cai. Un garapiellu d’estudiantes de Trabayu Social xunto col Coleutivu Mar de Niebla quixeron forciar una mirada sobre ellos, enllenando Xixón de figures de cartón cola so respeutiva hestoria.

Asina lleemos, por exemplu, la hestoria de Lucia, 43 años, que tras colar d’un matrimoniu “difícil” vive nuna casa abandonao, ensin agua nin llume, entantu les sos fies viven cola güela, o la de Jose Antonio, autónomu demientres años que fina viviendo nel so coche nuna ciudá estraña. Vides ayenes con mensaxe pa toos.

De los 255 ensin techu xixoneses, más de dos tercios (169) son homes, frente a 61 muyeres.

La mayoría tienen pente 46 y 65 años, una edá a la que ye abegoso alcontrar trabayu, más entá viviendo nestes condiciones. Nueve d’ellos tienen más de 65  años y 41 entre 19 y 45. En contra de lo que se camienta, namás ún de cada diez tien orixe estracomunitariu.

L’86% d’estes persones nun tienen ingresos o son inferiores a 450€, pero ye destacable el 14% que vive na cai pesi a tar cobrando la prestación por desemplegu: cenciellamente, nun algama.

 

El programa Eslabón, de Mar de Niebla, non solo visibiliza el problema, sinon que dan atención y sofitu a les persones que nun tienen llar o lu tienen mui precariu. Con esta aición concreta pretenden “captar l’atención y tratar de facer apalpable una realidá ante la que nunca nun mos aparamos, nuna sociedá qu’invisibiliza aquello que nun quier ver”.