Coincidiendo cola cellebración del Díi de la Costitución española, Andecha Astur refuga la llexitimidá de la costitución española de 1978 nel territoriu asturianu, y pidi al Ayuntamientu de Llangréu que sofite la República Asturiana, faciendo un actu d’homenaxe a la mesma el 6 d’Avientu na Cai Belarmino Tomás, llantando una asturina na mesma

Dende’l partíu nacionaliegu declárense fartos de ver comu dende partíos como IU o Podemos sigue reclamándose la República Española pero al tiempu cellebren y sofiten la Costitución Española Monárquica, un documentu que tien comu principales pegoyos la “indisoluble xunidá del territoriu español” ya’l caltenimientu d’una forma de gobiernu medieval  na que “El rei d’España ye’l xefe d’Estáu del país, símbolu de la so xunidá y permanencia”.

P’Andecha Astur la República Asturiana ye la espresión actualizada del Conceyu Soberanu d’Asturies de 1937, caberu marcu llegal escoyíu polos asturianos, presidíu por Belarmino Tomás, menospreciáu pola República Española, baltiáu pola fuercia pol réxime facista de Francisco Franco ya ignoráu pola dinastía borbónica.

Poro, pidin que’l Conceyu de Llangréu, comu llugar de nacimientu de Belarmino Tomás, reclame la figura de la República Asturiana y desixa al “Principado” l’entamu d’alderiques colos Conceyos asturianos pa xestionar el so procesu costituyente.

Tamién proponen la cellebración d’un actu d’homenaxe al Conceyu Soberanu na cai que lleva’l nome del so presidente, como rempuesta a les cellebraciones del Díi la Costitución Española.

Redaición InfoAsturies

This work is licensed under a Creative Commons Attribution 4.0 International License.