A los más de 400 usuarios que carecen el caprichosu corte de la llinia El Berrón-Llaviana xúnense los más de 1.000 que se vieron afeutaos pol corte nel tráficu ferroviariu pente Campumanes-Ponte los Fierrros y na llinia de cercanies C1

Ayeri una avería na catenaria interrumpió la circulación de trenes pente Asturies y Lleón, dende primeres hores del díe dica les seis de la tardi, afeutando a doce trayeutos a seis conesiones con Madrid y a otra más con Barcelona, amás de la llinia de cercanies C1 Xixón-Uviéu- Ponte los Fierros. Los trayeutos supliéronse con tresportes per carretera, col consiguiente retrasu y molesties.

Entantu, na Cuenca’l Nalón ya entamó’l preslle pa la reparación del tunel de Carbayín, obres que pudieron facese peles nueches ensin necesidá de cortar el tráficu, pero que la empresa prefirió facer de díe. Como conecuencia los pasaxeros qu’entá quieran viaxar en Renfe tienen que facer un duple trayeutu: dica’l Berrón nos autobuses puestos por Renfe y dende’l Berrón en tren. Los viaxeros quéxense de que’l corte entamó anantes de lo anunciao (el 30 de Payares ya nun furrularon los caberos trenes), de que los autobuses nun garanticen dar serviciu a tolos viaxeros, colo que dalgunos queden en tierra y sobre tou de la tardanza. El trayeutu nesti autobús, que fae toles paraes de la llinia ferroviaria, entarda 1:10 minutos dende Llaviana a El Berrón, más de lo que yendo en tren s’entardaría en facer el percorríu completu dica Xixón.

Amás d’ello güei continúen “temporalmente interrumpios” los servicios de Xixón cercanies y Xixón Xovellanos, sigún recueye la páxina web de Renfe cercanies, seique nun se tenga información del motivu.

En conxuntu, un escenariu dantescu qu’espeya bien la situación precaria na que s’alcuentra un serviciu ferroviariu qu’en so tiempu foi conocíu comu un de los más rentables y eficientes de la Península. Son munchos los qu’albidren qu’hai una intencionalidá económica y política tres d’esti progresivu desaniciu y denuncien les continues averíes, la falta de caltenimientu de los trenes y vies y la descomanada falta de personal -tantu de conductores comu de taller- que lleva a un costante pingar de suspensiones de trayeutos.

This work is licensed under a Creative Commons Attribution 4.0 International License.