Coincidiendo cola cellebración del Díi de la Costitución española, Andecha Astur cellebró güei 6 d’Avientu un actu de refuga de la mesma y de reivindicación de la República Asturiana como unicu marcu posible pa garantizar los drechos individuales y colleutivos de los asturianos, ufriéndose como “ferramienta d’organización alrodiu de la qu’encadarmar la llucha de los asturianos, teniendo siempres presente que la mesma tien de ser dende la izquierda y que’l so marcu ye necesariamente Asturies”

Nel actu, que tuvo llugar al llau del monumentu conmemorativu a Belarmino Tomás, presidente del Conseyu Soberanu d’Asturies, naguróse un monumentu con forma de pegollu, nel que descubrieron una placa col llema “República Asturiana” y que val de pie pa una asturina.

Na intervención política Llucía Fernández destacó’l calter “monárquicu, contradictoriu y antidemocráticu” de la costitución española, denunciando la incongruencia de munchos partíos d’ambetu estatal que s’autoproclamen como adalides de la república al tiempu que participen nos actos d’homenaxe a una costitución que sustenta la monarquía, y defendiendo frente a ello  la República Asturiana como un apueste de futuru.

Nel so discursu tuvo unes pallabres pal fin de la minería “pero non del espíritu de llucha que la mesma representa”, pal ascensu del facismu “propiciau polos mesmos preceptos de la Costitución” y pa la Oficialidá, de la que, remembró, nun hai siquiera una mención nos nuevos presupuestos p’Asturies. Amás de refugar la costitución española “por tolo qu’implica pal Pueblu Asturianu” afirmó refugar tamién el futuru de desaniciu, despoblación, probitú y perda d’identidá qu’España ufre, faciendo un llamáu a tolos antimonárquicos d’Asturies

“A los que creen na república como sistema de gobiernu  dígo-yos que l’únicu camín pa finar col reinu ye declarar la República asturiana. Dende los pueblos del estáu tendrán de ñacer les repúbliques que presllen la transición, finando col reinu d’España y presllando un ciclu hestóricu. Dende Asturies ñacerá la República, y sedrá soberana”.

Darréu la intervención, llantóse cola participación de los presentes un carrascu, árbol protexíu por tar en riesgu d’esaparición nos nuesos montes, como símbolu de la llucha “viva y en comuña” del pueblu asturianu.

Redaición InfoAsturies

———————————————————————————————————

This work is licensed under a Creative Commons Attribution 4.0 International License.