Xilecos Mariellos ven na importancia que dende la prensa se ta dando a la participación residual de grupos nazis nes movilizaciones un intentu de criminalizar y dividir el movimientu, que busca consiguir n’Asturies la capacidá de rempuesta algamada pola ciudadanía francesa

El sábadu pasáu, pesi a los intentos de facer fracasar la convocatoria espardiendo la idega de que a la mesma acudirien grupúsculos facistes y mientres Hogar Social convocaba en Madrid una concentración ensin prauticamente participación, Asturies y especialmente Avilés foi exemplu, con una de les convocatories más esitoses de too l’Estáu. Na mesma destacó la participación de persones de toles edaes y grados d’implicación social, dende veteranos lluchaores dica xente que s’estrenaba en movilizaciones, pero sobro tou destacó por ser una de les que tinía más clares les coses.

El movimientu Xilecos Mariellos n’Asturies defínese a si mesmu comu Anticapitalista y poro Antifacista, de Clas Obrera “de toa esa mayoría social que tenemos los mesmos problemes (paru, esplotación, desfiucios, probitú, precariedá…) y queremos la mesma solución, lluchar por un mundu nuevu“. Nesi sen, los Xilecos busquen vies d’actuación que nun se queden en movilizaciones y concentraciones a cencielles, sinon qu’estes evolucionen en daqué más granible.

Por agora, continuen coles concentraciones y esti sábadu 15 tornarán a salir a les cais, esta vegada en Xixón, na so llucha contra lo que denomen la “dictadura del capital”. Sedrá na Plaza l’Humedal, de magar les 18:00.

Llucía F. Marqués

This work is licensed under a Creative Commons Attribution 4.0 International License.