Ecoloxistes n’Aición denuncien una batida multitudinaria pa cazar llobos ensin control nin permisos que tuvo llugar el 10 d’Avientu, seique nun se conoz el númberu de víctimes. Dala base científica avala esta triba d’actuaciones y la suma d’estes caceries illegales colos llobos muertos “oficialmente” nun tan sirviendo, de fechu, p’amenorgar los daños a la ganadería
La fastera meyor conservada del Parque Nacional de los Picos de Europa, la lladera norte de la Sierra de Coriscao, zona crítica pa la conservación de bon númberu d’especies protexies de flora y fauna pente les que destaquen el Gallu Montés y l’Osu Pardu, foi l’escenariu d’una cacería na que participaron un númberu indetermináu de persones, pente 50 y 100, la mayoría ensin habilitación específica, dellos ensin siquiera permisu d’armes. N’avientu del 2013 tuviere llugar un fechu asemeyáu nel que se cazaren illegalmente otros nueve llobos de la mesma manada. De magar entós les caceríes ensin permisos vienen repitiéndose, habiendo prebes documentales d’ello del añu 2015, denunciándose tamién la muerte d’una lloba recién paría el 5 d’esti mes y otra más el fin de selmana, a lo llargo d’una xornada de caza de xabaril.
Los ecoloxistes denuncien que, xunto con vecinos de la llocalidá de Camaleño y los cazaores participaron na batida dos trabayaores del Parque, ensin autorización pal usu d’armes de fuéu nel exerciciu les sos funciones, asina como un númberu indetermináu de Téunicos Ausiliares del Mediu Rural.
Ecoloxistes n’Aición estudia la posible presentación d’una demanda xudicial, ya que estes actuaciones de caza de llobos son illegales, clandestines y dañibles, non solo pol mal fechu a los llobos sinon poles consecuencies n’otros animales. L’usu d’esplosivos pa llevantar o facer correr a los animales y asina poder disparayos meyor -métodu prohibíu espresamente pola llexislación de caza- afeuta a les otres especies que conviven nel Parque, creando amás un fuerte riesgu d’incendiu. Otros medios illegales utilizaos son los cebaeros y los visores nocturnos.
Toos estos incumplimientos de la normativa mediuambiental y de les autorizaciones específiques pal control poblacional de llobos nel espaciu protexíu de los Picos d’Europa son perfechamente conocios pola direición del Parque, que de fechu potencia la so impunidá.
Llucía F. Marqués
This work is licensed under a Creative Commons Attribution 4.0 International License.
