Tres d’aprebase por unanimidá en Plenu la Moción presentada por Conceyu Abiertu per Noreña, unos adoquinos van recoyer nel so pueblu natal la memoria de dos de los asturianos que llucharon contra’l nacismu y poro foron internaos en centros de concentración

Esti vienres 14 d’avientu’l Conceyu de Noreña rinde homenaxe a Manuel Pañeda Nuño y Vicente García Riestra. Namás ún d’ellos va tar ellí, ye’l postreru sobreviviente asturianu de los campos.

Manuel Pañeda Nuño, noreñense muertu nun campu de concentración nazi foi deportáu al campu de Mauthausen (Austria) el 27 de Xineru de 1941 onde sobrevivió pocu más de seis meses, finando’l 6 d’Agostu de 1941 a los 44 años.

Vicente García Riestra, postreru superviviente asturianu del campu de Buchenwald, fuxó a Francia siendo un neñu, tres el golpe d’estáu franquista. Ellí integróse na Resistencia contra los nazis, trabayando como corréu y espía fasta que foi deteníu, torturáu pola Gestapo y deportáu al campu de concentración de Buchenwald, nel que pasó quince meses; dende la so lliberación dedicóse a percorrer los centros educativos franceses ufiertando’l so testimoniu a los más mozos. La so hestoria ta recoyida tamién nel llibru ‘42.553: Depués de Buchenwald’, de Xuan Santori, obra que ganó’l Premiu Máximu Fuertes Acevedo.

La so memoria va permanecer nes cais de Noreña, representada nos adoquinos instalaos nel so homenaxe.

Nuria Prendes

This work is licensed under a Creative Commons Attribution 4.0 International License.