Esti añu España foi condergada ocho vegaes por frayar los Drechos Humanos

Violación del drechu a la llibertá d’espresión y al respetu de la vida familiar y privao, tortura y xuicios ensin garanties, son los delitos polos que se conderga reiteradamente al estáu español

Nel 2018 el TEDH, la másima autoridá xudicial pa la garantía de los drechos humanos y llibertaes fundamentales del Conseyu d’Europa tornó condergar a España por nun respetar estos drechos y llibertaes, recibiendo amás una llamada d’atención por parte de Rights International Spain pola especial reincidencia d’esti país, que ye condergáu añu tres d’añu polos mesmos delitos “Los casos descritos paecen señalar qu’España amuesa ciertu nivel de reticencia tocantes a la realización efeutiva de dellos drechos rellacionaos cola disidencia política”, critica Rights International Spain nel so balance añal.

El casu de Otegi, la quema de semeyes del rei y les tortures a presos d’ETA foron dalgunes de les condergues que recibió España esti añu del TEDH. Pero’l suspensu d’España en Drechos Humanos va más allá. Espertos internacionales na materia amosaron la so esmolición pola actuación del estáu español en Cataluña, la llegalidá de la Llei de Seguridá Ciudadana (Llei mordaza) y el conceutu de delitu d’enaltecimientu del terrorismu, asina comu la evidente falta de llibertá d’espresión, polo que ye d’esperar que nel próximu añu reciba otru bon númberu de condergues.

En concretu, el relator especial de la ONU pa la llibertá d’espresión encamentó a les autoridaes españoles a nun procesar a los cabezaleros independentistes catalanes pol delitu de rebelión yá que estes acusaciones “podríen entrañar el riesgu de disuadir discursos llexítimos dafechu“. Por ello, amosó la so esmolición “sobro utilizar cargos per rebelión por actos que nun implicaben violencia o enguizamientu a ella, porque esto podría interferir con drechos a la protesta política y a la disidencia”.

Amás la Comisaria de Drechos Humanos del Conseyu d’Europa señaló a España como un exemplu problemáticu d’aplicación de la lexislación antiterrorista. Y ye que, argumentó, los términos ambigüos de los delitos d’enaltecimientu y humildación a les víctimes “resultaron en restricciones desproporcionaes nel exerciciu del drechu a la llibertá d’espresión”.

Llucía F. Marqués

This work is licensed under a Creative Commons Attribution 4.0 International License.