República Asturiana, antifacismu, mocedá, feminismu, municipalismu y candidatures populares sedrán los protagonistes d’esta xornada d’información y alderique, que ta abierta a la participación ciudadana y a la qu’acudirán representantes d’estremaes nacionalidaes del estáu

Esti sábadu 22 Andecha Astur cellebra en Noreña una xornada abierta na que se tratarán dellos temes d’actualidá y que pretende, comu’l so nome indica, ser un puntu d’alcuentru  pa aquellos y aquelles que se planteguen p’Asturies “un futuru estremáu del que ufren dende l’Estáu español y consideren la República Asturiana comu’l únicu camín pa que’l país avance na direición correcha”.

L’Alcuentru entamará a les 13 hores cola rialización d’un Murial Popular na cai El Fontán, y continuará de magar les 16 hores nel Llar d’Alcuentru de la Muyer cola charra “Doce xides pa la República Asturiana” a cargu del mayestru y escritor Mariano Suárez, continuando darréu col alderique “Mocedá, feminismu, antifacismu” na qu’intervendrán -ente otros-  representantes d’Ernai, organización de mocedá nacionaliega vasca. Darréu’l tema a tratar sedrá “Municipalismu y candidatures de xunidá popular“,  cola participación de Conceyu Abiertu por Noreña.

L’Alcuentru finará con un conciertu a cargu de Músicos xuníos por Noreña, que tendrá llugar nel Prestosu, cafe-vintage.

Redaición InfoAsturies

This work is licensed under a Creative Commons Attribution 4.0 International License.