Por que mos pruye; pol conceutu mesmu de nación; pola nuesa hestoria; pola hestoria recién; porque yos lo debemos a los nuesos mayores; porque ye un drechu internacional; porque ye la única forma de pidir responsabilidaes; por sobrovivir como pueblu; pola nuesa identidá; porque otra cosa nun mos val; por que ye posible.La intervención de Mariano Suarez nel marcu de “Alcuentru’18” resumió rellumantemente los doce porqués que faen imprescindible la llucha pola República Asturiana

Como davezu nes sos charres, Mariano Suárez xunió sentimientu, una pizca de comedia, muncho razonamientu y, perriba tou, fargataes del so ablucante conocimientu de la hestoria, l’actualidá y la cultura asturianes. Con esos ingredientes enganchó dafechu a la concurrencia, que dexó pasar dos hores llargues de charra ensin un segundu d’aburrimientu.

El primer argumentu nun pue ser más suxetivu y al tiempu más importante: Lluchamos por que mos pruye una República Asturiana “si una xente nun tien unes coraes nes que balta un sentimientu nacional ye imposible de xeneral artificialmente un movimientu políticu que vaiga tener una consecución política práutica. Asturies tien esi sentir nacional, seique triestimente entá nun tresciende lluéu a la hora de les votaciones”. Comu exemplu esperanzaor, los 28 nuevos estaos surdíos n’Europa nos caberos 118 años y los más de 33 movimientos actuales pola independencia en dellos estaos “Pueblos que yos pruya esisten, pueblos que los consiguen, tamién, pueblos que entá nun lo conseguimos tamién, pero realmente ye posible y la hestoria reciente d’Europa demuestra que se puede conseguir“. Nesi sen destacó comu esos estaos aportaron a un procesu d’independencia por estremaes vies, comentando dellos casos actuales comu el de Groenlandia, Quebec, les Islles Feroe o Escocia. “Tolos pueblos que pelearon y pellen pola independencia tienen que partir d’un sentimientu nacional, d’un necesariu procesu d’acumulación de fuercies y de contaxu de la enerxía nacionaliega. Esto solo se puede facer dende organizaciones nacionaliegues”.

Segunda xida: el conceutu mesmu de Nación. Mariano entamó revisando la definición  de nación fecha na Declaracion de les naciones Xunies en 1960, continuando darreu pola de dellos espertos internacionales na materia, comprebando en cada casu qu’Asturies cumple, puntu por puntu, les condiciones requeríes en cada casu. Esplorando tamién los conceutos d’Etnofaxa y desnacionalización apunta tamién a les causes de la situación actual del país.

Comu viniente puntu, aludió al enfotu hestóricu de ser de la República Asturiana, faciendo un rápidu repasu a los 8 momentos hestoricos nos que’l pueblu asturianu se llevantó contra la opresión, fasta 14 vegaes: el nacimientu d’Asturies con Pelayo, la llucha pola autonomía del reinu d’Asturies de Gonzalo Pelaez, Urraca y Alfonso Enrique, mayu del 1.808, Ochobre del 34 cola República Obrera y Campesina d’Asturies y Belarmino Tomás col Conseyu Soberanu d’Asturies y Lleón

Darréu fizo un repasu al puntu viniente: la hestoria de recién y recalcó la emportancia de caltener la llucha pola República Asturiana por respetu a los nuesos mayores, a una tradición  hestórica y familiar. Un pueblu que quiera algamar un futuru tien de partir d’una memoria hestorica que xustifica la necesidá d’un réximen políticu propiu”

La República Asturiana ye tamién pa Mariano la unica manera de sobrevivir como pueblu.  Asturies carez un Etnocidiu de llibru: otru pueblu nos somete, nos desplaza y nos impon la so cultura. El repasu a tolos indicadores sociolóxicos y económicos actuales ye llaceriosu: PIB, demografía, emigración, desemplegu, despoblación, perda d’empreses… . “El futuru del Estáu español p’Asturies ye ser un paraisu natural pa los demás, nel que nos seyamos los camareros de los visitantes y esa ye la unica opción qu’España pon enriba la mesa p’Asturies (…) tou esto ye una decisión política que reconfigura la estructura social d’un pueblu y contra eso namás val un proyeutu politicu propiu autoxestionáu”.

Porque ye la unica manera de caltener la nuesa identidá. Llingua, padremoñu, paisax, fauna, mou de vida… tou lo que mos define vese menaciao pol desaniciu si nun tomamos midies los asturianos mesmos. Arriendes d’ello ye emportante ser soberanos porque solo asina podremos desixir responsabilidaes a los causantes de la llaceria. Mariano remembró qu’Asturies supera la media europea de corrupción y como muestra citó dalgunos de los casos más recientes: Casu Marea, Musel (I yII), Villa-SOMA-PSOE, casu Kiko, Nienmeyer, Aquagest, Teberga, Casu Ayer, Grandas de Salime…

Nel puestu once l’orador acudio al drechu internacional. Acordies l’Asamblea Xeneral de les naciones xunies, la nacencia d’un estáu soberanu independiente, la llibre asociación con otru estáu independiente o la adquisición de cualquier condicion politico ye llibremente decidío por un pueblu. Esta declaración llexitimiza les aspiraciones d’autodetermín del pueblu asturianu

La llaceriosa xestión que d’Asturies ficieron tolos anteriores rexímenes españoles (Monarquíes absolutistes y parllamentaries, republiques, rexímenes  militares…) llevenmos a la penúltima custión:  tolo demás nun mos val.

Y la cabera xida: disponer d’un rexime políticu propiu ye posible.

Redaición InfoAsturies

This work is licensed under a Creative Commons Attribution 4.0 International License.