Esta Nuechibona cerca’l 20% de los asturianos pasarán frio. Nun sedrán solo los más de mil ensin techu que viven nel país: a ellos sumamos más d’un 18% de llares asturianos na que prender la estufa ye impensable, por nun poder facer frente a la factura lléutrica. Nun ye probitú enerxética, ye probitú, a cencielles

La perda del bonu social tres de la so cabera reforma, unes aides repartíes por conceyos qu’escasamente cubren el 20% de les solicitudes, la subida del preciu de la lluz (30% de la factura) y sobro tou, la situación de precariedá y miseria na que subsisten ca vegada más asturianos llevanos a esta situación, na qu’Asturies ye la fastera más perxudicada del Estáu, col triple de llares nesta situación, triplicando la media española y triplicando tamién el nivel de probitú enerxética asturiana del 2002.

Demientres a nivel estatal la salida de la crisis supunxo esti añu una llixera meyora d’un 0’7% na situación de los llares que nun pueden caltener la vivienda a una temperatura afayaiza, n’Asturies el problema agravóse fuertemente, pasando d’un 6’2% en 2002 a los actuales 18’4%.

Asina lo recueye la Encuesta de Condiciones de Vida del Istitutu Nacional d’Estadística (INE) nel que se valora, pente otres cuestiones, los casos de llares que nun pueden satisfacer les sos necesidaes d’enerxía por mor de los costes o tien que destinar un porcentaxe escesivu de los sos ingresos a pagar les factures.

Güei, comu tol mes, nes principales ciudaes asturianes rellumarán milenta bombielles  allumando’l Nadal, entantu nes sos cases munchos asturianos nun prenderán dala lluz . Igual tamos pescanciando mal tol tema del espíritu navidiegu.

This work is licensed under a Creative Commons Attribution 4.0 International License.