La cifra a pagar podría sobropasar los 19 millones d’euros y previsiblemente sedrá a cargu de tolos llaniscos

El baltu de l’ampliación del Hotel Kaype, propiedá de la sociedá Carrera y Pérez S.L., foi ordenáu pol incumplimientu d’una riestra de normatives urbanístiques: primer llinia de playa y reagrupación illegal de finques; sicasí, la empresa nun cometiere dala falta alministrativa, ya que cuntaba con toles llicencies y permisos pertinentes, apurrios polos responsables municipales de la cuestión.

Nel xuiciu nun hai imputaos penales nin responsabilidaes direutes: namás una indemnización solicitada al conceyu polos propietarios del Hotel Kaype en compensación pola anulación de llicencies que motivó’l derribu del complexu, y que  sobropasaría los 19 millones d’euros.

“Pretender que los llaniscos tean que responder económicamente poles consecuencies de la concesión una llicencia municipal d’agrupación de finques sobro les que se llevantó l’ampliación del hotel en primer llinia de playa, anulada dempués pol TSXA, resulta inaceutable dafechu” declaró Arturu X. B., voceru de la organización nacionaliega.

Andecha Astur desixe que l’Ayuntamientu Llanes tome les midíes afayaíces pa que seyan los responsables de la concesión d’esa llicencia iregular y non los vecinos de Llanes los que respuendan económica y llegalmente de les consecuencies d’esta concesión. Pa ello apunten a la entós alcaldesa, Dolores Álvarez, y José Herrero (diputada rexonal pol PSOE y secretariu xeneral del PSOE llaniscu respeutivamente anguañu), xunto con otros posibles responsables, acusándolos d’especular cola masificación turística nel conceyu, especulación que, sigún AA, tuvo la so másima espresión nel Plan Xeneral d’Ordenamientu Urbanu qu’afortunadamente Andecha Astur foi quien a anular nos tribunales.

Redaición InfoAsturies

This work is licensed under a Creative Commons Attribution 4.0 International License.