Los trabayadores emitieron un comunicáu nel qu’agradecen a los sos veceros que faigan les compres por adelantao
Ante l’apertura de dellos establecimientos esti domingu, neto que se fizo el fin de selmana pasáu, los trabayaores de los supermercaos y cientros comerciales pidin solidaridá ante l’abusu que representa quitayos el díe de descansu, precisamente nunes feches ya especialmente dures pol escesu de trabayu nes que, sigún denuncien “Paradóxicamente ye cuando más se visualiza que pa la patronal tan anantes los beneficios que les presones”.
La conciliación de la vida familiar y la llaboral ye un drechu del que se ven privaos cuando les selmanes llaborales se faen d’ocho díes. La cada vegada más espardía práutica d’abrir tiendes en domingos y festivos cuando asina convién a la empresa afítase na rentabilidá producía pol volume de ventes feches nesos díes, polo que ta en man de los consumidores facer pocu rentable esa apertura. Pa los trabayadores, abrir en festivos y fines de selmana ye un esfuerciu grande que la empresa yos desixe, pero pa los consumidores mercar por selmana requier namás un pocu de planificación previa. Poro, treslladámosvos el pidíu que mos faen:
“Nun contribuyir a esta esplotación ye’l meyor regalu que podéis facenos nestes fiestes. Gracies”
Nuria Prendes
This work is licensed under a Creative Commons Attribution 4.0 International License.
