Mariano Suárez

Carta a Andrés Solar (nel so 34 cabudañu)

Hola, Andrés.

Naguo porque al recibu d’éstes llínies sigas escribiendo prestosos poemes en dalguna de les ñubes qu’esnala sol Güeyu Deva. Si dalgo necesita Asturies anguañu, amás de dinidá y puxu, ye poesía, de la tuya, vamos: “Prúyemos un pueblu llibre / que nome cola so voz / los collacios y el pan. / Prúyemos un pueblu llibre / y una Asturies dixebrá”.

Escríbote por abondes razones, Andrés. La primera ye porque güei visitéte nel Cimenteriu Deva, que yera’l 34 cabudañu y alcuérdome comu si fore güei de cómu dexasti la vida nuna carretera, cuandu veníes d’andechar pola nación pelos caminos d’esa Asturies llibre que te pruyía, que mos pruye.

Escríbote porque nunca t’agradecí lo muncho que me deprendiesti comu profesor d’asturianu na Universidá Popular de Xixón. Agradézotelo enforma, collaciu; honráu que me siento de tener entós un profesor que foi Académicu de la Llingua Asturiana, un académicu que falaba claro y que, ayenu a los pequeños estrategues de salón y a los cambalaches ente les bambalines sedoses del poder, defendió siempres la oficialidá del asturianu comu la llingua d’Asturies.

Escríbote, Andrés, pa dicite que los tiempos tán camudando a dalguna xente que conociesti, a dalgunos de los que canciaron les tos lletres, a dalgunos qu’escanciaron culinos contigo…

Si quies que te seya sinceru, nun ye qu’esa xente vaiga sintiendo’l pesu los años acordies avieya, non; la falta puxu podría perdonase, que toos vamos pa vieyos y sabemos lo que ye llevantase ca díi pa facer la to xera y ver, de pasu, cómu enconties la nación.

Tampocu nun ye que descubran agora que les poltrones de bona pelleya seyan meyor asientu que los escaños de maera de los nuesos vieyos llares, tampocu; ensin compartilo, podríemos atalantar que daquién guetare aposientos más acomodaos (con dietes y micrófonu) pa les sos ñalgues.

Nin la vieyera nin la comodidá. Hai xente que dixo defender la nación asturiana cuandu tú yeres un referente dinu d’ella y qu’anguañu yá nun fala d’esto, nin quieren alcordase d’ello, nin soportaríen que güei se ficieren virales les sos pallabres vieyes, sabes. Hai presones que conociste, Andrés, y muncho, qu’agora nun puen caltener la so mirá ente l’espeyu de quienes dixeron ser. ¿Tán irreconocibles? Pos sí, talamente.

Quiciás dalgún díi tuvieron los dos pies afitaos na defensa visible d’una Asturies dixebrá, quiciás. El casu ye que tán acabantes de pasar la raya. Home, ellos yá lo dicen: “podemos”. Y sí, claro que puen cruciar la raya, faltaría más. Pero ensin engañar, eh. Porque agora’l so enfotu cimeru ye que nun se-yos note. Y non, nun val engañar. Nun quieren que miremos la propia raya. Pídenmos que miremos sólo’l deu col qu’apunten les posibilidaes del so nueu camín (el posibilismu españoliegu qu’escueyen, vamos). Pídenmos que calculemos el pesu les sos nuees fuercies (españoles). Pídenmos que nun reparemos en que nel so nueu llar la cabera pallabra (dixital y moderna, eso sí) siempres la tienen en Madrid, comu asocedió colos partíos y sindicatos españoles que mos vendieron tola vida. Pídenmos que nun seyamos aldeganos por mirar si’l nueu indianu de casona y palmera ye de Colombres o d’acullá. Y resulta, Andrés, qu’agora préstense comu criaos d’un indianu de Galapagar, que cuandu fala de naciones y estaos tien el mesmu discursu del PSOE de Pedro Sánchez: soi español; en “España” hai varies naciones (española, vasca, catalana, gallega), pero defendemos un sólu estáu, l’español, pa esta “nación de naciones”. Y, nesa condición, atrévense a siguir falando de la necesidá d’un poder asturianu, llendándolu, ensin más, a una “reforma estatutaria”. Sí, sí, comu te lo cuento, Andrés. Dícenlo asina, colos dos pies al otru llau la raya y la cara al sol.

Lo de siempres, Andrés, que cuandu crucies la raya ellí, al otru llau, nun hai sitiu dalu p’Asturies. Y cruciáronla, collaciu, cruciáronla con artes de prestidixitaor baruyeru: ximielguen ensin aparar el so deu pa que miremos sólo onde apunten porque, en rialidá, quieren facemos creyer qu’entá tienen los dos escarpinos nel llau asturianu de la raya. Pero non, tiénenlos yá onde nun los teníen mentantu tú vivíes: nel mundiu tenebrosu onde Asturies nun decide. Nel Estáu español que, yá seya república, dictaúra o monarquía, siempres decidió por nós y finó por emburriamos a esta poza de corrución, esplotación económico, desestructuración social y emigración forciá. Nel llau de la raya onde tú nunca quinxiste tar.

Gracies por ello, compañeru.

Y un abrazu nel to tiempu etenru.

This work is licensed under a Creative Commons Attribution 4.0 International License.