Viaxar, prender la lluz, falar por teléfono, trabayar como autónomu o facer un unvíu postal ya ye más caro que va dos díis

L’añu nuevu trae xubíes de cuasi tou, seique por un añu y esceicionalmente hai una subida que ye pa cellebrar: la del SMI. Tanto ye asina que mos cuesta creyelo… va menos d’un mes trabayaores de supermercaos peleaben cola patronal por una xubía de 50 € que los averaba a los 800 mensuales y agora de güelpe van cobrar los 900 de mínimu… vaya, tamos tan pocu avezaos a les bones noticies que munchos nun lo creeran fasta tener na man la nómina de xineru.

Llamentablemente, esta xubía dexa de lláu a cien mil asturianos d’ente los más desfavorecios, ello ye, a los cerca de 75.000 que nun tienen emplegu y a los más de 24.000 que dependen del Salariu Social (de los que más de mil siguin esperando la resolución de la so solicitú, ello ye, qu’enta nun cobren res). Tampoco beneficiará a los autónomos, cuya base mínima torna a xubir, un 1’25 pa la cuota mínima a la Seguridad Social, lo que se torna’n   5,36 euros al mes, 283,3 euros anuales, y 6,89 euros nel casu los societarios. Los pensionistes recibirán una xubía del 1’67%, ello ye, pente 6 y 30 euros mensuales; los más desfavorecios (pensiones non contributives y mínimes) tendrán una prestosa xubía del 3%.

No que cinca a xubíes menos gayasperes, Asturies afonda nel so aisllamientu cola xubía del peaxe del Güerna y l’incrementu del preciu de los carburantes. En concreto, enllenar el depósitu de diesel cuesta 4 euros más y la segunda xubía de los peaxes en dos años alluga’l pasu del Güerna en 13’7 euros. Renfe xubirá los viaxes a media distancia un 3’5% ya’l serviciu de distancia a alta velocidá (AVANT) un 7%.