“RTPA sigui siendo’l güertu particular d’Antonio Virgili. Sicasí, RTPA ye un duernu pa cuatro, un duernu que pagamos toos y toes y que sufrimos tolos díes los que tovía tenemos gracia pa sintonizar la canal”
La Xunta pola Defensa la Llingua Asturiana estrena l’añu con un comunicáu nel que denuncia que, baxo la xestión d’Antonio Virgili & Cia, la TPA “afonda nos prexuicios ideolóxicos” y marxina más ca vegada la nuesa llingua, comu amuesa lo asocedío estes fiestes navidiegues, nes que nin siquiera s’emitieron contenios duplaos al asturianu.
Pa la Xunta, el de la RTPA ye un casu únicu pente les televisiones del estáu, ya qu’incumple dafechu la llexislación vixente, l’Estatutu d’Autonomía, la Llei d’Usu y la mesma Llei de RTPA, qu’esplicita que la cadena tien que ser una ferramienta pa promocionar l’asturianu.Poro, denuncien que la TPA “discrimina l’asturianu, malgasta recursos públicos y nun crea puestos de trabayu al emitir estes películes infantiles n’español, dando un pasu más na discriminación hacia la nuesa llingua llevada alantre pola dirección encabezada por Antonio Virgili”.
Lloñe del pruyimientu popular por una televisión dafechu n’asturianu, a lo llargo del 2018 diérense pasos p’atrás nel yá escasu usu del mesmu nos medios públicos, eliminándose la emisión mensual de partíos n’asturianu en RPA y na TPA y no que cinca al duplaxe, esti añu nun se dupló nin un minutu al nuesu idioma, pesi a que’l duplaxe tendría de ser un exe estratéxicu na normalización llingüística, amás d’una importante fonte de trabayu pa los actores asturianos.
D’otra miente, los programes n’asturianu emitíos a lo llargo d’esti añu puen cuntase colos deos d’una man y emítense a cuentagotes, nos peores horarios y con temporaes más curties que los espacios n’español – la XPDLA nun cuenten como programación n’asturianu de gales musicales onde too val y predomina lo cutre-.
No que cinca a la radio, denuncien que la RPA ye una emisora que dexa de llau non solo la nuesa llingua sinón tamién la nuesa música, siendo raru’l díi nel que na cadena pue sentise un cantar n’asturianu, en concreto, 50 minutos a la selmana na única emisora de radio pública d’Asturies. “Una situación que tendría de poner colloraos a los sos xestores y a los políticos de la Xunta Xeneral que callen énte esta situación”.
Esta ye un casu más de discriminación y marxinación de la llingua llariega que namás tien una salida: la Oficialidá, darréu y con toles sos consecuencies, que fine con estos continuos casos d’Asturfobia que se carecen n’Asturies.
Redaición InfoAsturies
This work is licensed under a Creative Commons Attribution 4.0 International License.
