Los galeses tienen nidio que’l futuru de les llingües pasa pola so inclusión nes nueves teunoloxíes y la so presencia en toda triba de dispositivos, polo que vienen d’alcordar con Mozilla la so presencia nos sos programes de voz dientro del “Common voices”, un proyeutu nel que, cola collaboración de la Universidá y l’enfotu de los falantes, l’asturianu tamién podría tener espaciu
La voz ta entamando a ser un de los medios d’usu d’interné más usáu, y va a más. Colos avances en reconocimientu de voz n’estremaos dispositivos, les rempuestes falaes y los llectores de testos, la comunicación por voz va garrando puxu comu parte diaria del usu d’interné.
Muncho más rápido y efeutivo que la mecanografía, la voz tien toles de ganar, pero esto costitui un grave problema pa les llingües minoritaries: los interfaces nun s’alcuentren nelles. De fechu entá son abondos los servicios que namás tan disponibles n’inglés y namás col tiempu van pasando a otres llingües mayoritaries comu l’español o’l francés, y los galeses dan l’alarma sobro la influencia d’esto nes nueses llingües.
“Hai neños que medrarán como falantes de galés que tienen nidio que namás l’inglés ye bono abondo pa les coses normales que faen a diario colos collacios y na escuela. N’otres pallabres, sedrán falantes de galés asumiendo internamente, de manera solida, que la so llingua ye inferior y comu amosó l’ésitu de los “Welsh Not” el complexu social d’inferioridá llingüística puede tornase nuna rápida arma d’estinción”.
Fasta equí, too treslladable pallabra por pallabra al casu asturianu. Pero en Gales van un pasu (o unos cuantos) per delantre cola normalización llingüística y Canolfan Bedwyr (el cientru pa la llingua galesa de la Universidá de Bangor) y Meddal.com vienen de guetar una prestosa solución pa ellos. Convencieron a Mozilla (un de les organizaciones ensin ánimu de llucru más grandes del mundiu, responsables del guetaor Firefox) pa ufrir la opción “Galés” dientro del so proyeutu de voz col que Mozilla fae por que’l reconocimientu de voz seya pa tol mundiu, Common Voices, una bas de datos de voz de códigu abiertu que cualquiera pueda usar pa facer aplicaciones anovaores pa dispositivos y web.
Cola collaboración de les voces de los falantes de galés, podrá usase la so llingua con Siri o Echo, pa falar colos sos coches, o trabayar n’internet; y como nun habrá un “operaor” inglés al otru lláu, nun tendrán que pelease con naide pa usar llibremente la so llingua. Ello ye, el galés podrá avanzar al par del inglés nel mundiu virtual, lo que nun ye namás un preséu de llibertá llingüística, sinon una ferramienta pa meyorar l’autoestima de los falantes menos convencios. Pa facelo posible, eso si, ye preciso que los galeses unvíen grabaciones cola so voz, ya que’l proyeutu de Mozilla -Common voices- trabaya con voces reales.
De fechu, depués del inglés, el galés ye un de los primeros incorporaos al proyeutu, xunto col francés y l’aleman y per delantres de los otros 40 idiomes que van entamando con más calma, pente los qu’alcontramos el brasileñu, el chinu, el frisiu, el danés, el rusu, l’español o’l catalán.
La implicación de la Universidá de Bangor foi imprescindible pal desendolcu d’esti proyeutu, ya que foi del so cientru d’estudiu de la llingua galesa de onde surdió la idega y foron ellos los que contautaron con Mozilla pa facer posible l’avance del Galés nel mundiu virtual.
Llucía F. Marqués
This work is licensed under a Creative Commons Attribution 4.0 International License.
