La flota pesquera d’Asturies, en pelligru de desaniciu

11 Xineru, 2019

La flota asturiana, con Avilés comu referente cabezaleru, ta n’inferioridá de condiciones, respeutu a Euskalerría, Galicia y más entá respeutu a Francia ya Irlanda, vraeros depredadores de la mar

La pesca ye otru de los seutores tradicionales asturianos que ta en vies de desapaición pola so falta de rentabilidá y pola falta de midíes pa la so proteición por parte’l gobiernu del “Principado”. Los continuos recortes y desixencies, cargaos sobro una de les flotes más ecolóxiques nel so furrulamientu d’Europa, faen ca vegada menos atractivu el trabayu en pesca, frenando el relevu xeneracional. El númberu d’embarcaciones dedicaes a la pesca n’Asturies cayó en más del 50% na cabera década, pero entá asina les autoridaes consideren que “la pesca solo sobrevivirá nel Cantábricu si se reduz el númberu de barcos nel calaeru”.La flota cantábrica cuenta anguañu con 4.861 embarcaciones, de les que namás 258 son asturianes. Les úniques que faen campañes rentables nos caberos años son los cerqueros, 9 n’Asturies. Les nueves midíes faen temer que se pierdan fasta otros cien barcos nun futuru cercanu.El sistema d’aplicación de la prohibición de descartes, que implica qu’un barcu dedicáu a una determinada especie pa la que tien cuota amplia tendrá que dexar de mariñar si por casualidá pesca más allá de la cuota d’otra especie que queda ensin querer atrapá nes redes, el preslle de la costera’l bonito el branu pasáu, la veda indefinía del oriciu, la competencia deslleal de flotes menos respetuoses que l’asturiana col entornu y la nueva -ya ruina- cuota de la xarda son dalgunes de les torgues coles que tendrán que bregar los pescaores asturianos esti añu.

El xabaz recorte de la cuota de xarda anunciáu el mes pasáu, más el recorte, recien propuestu pol Ministeriu de pesca español, del 25% pa pesca acidental, dexa a la flota dedicada a la xarda con menos de mil tonelaes de cupu, insuficiente pal so caltenimientu. Tou ello xunto apunta al amarre de bona parte la flota pesquera, ya’l desaniciu d’otra de les formes de vida más tradicionales d’Asturies, la venceyada a la mar.

Llucía F. Marqués

This work is licensed under a Creative Commons Attribution 4.0 International License.