Los docentes asturianos son los que carecen peores condiciones llaborales del estáu, tantu no que fai a salarios como a horarios lleutivos
Vien de ser espublizada la propuesta de plantiyes del profesoráu asturianu pal prósimu añu y nella nun s’acolumbra malpenes recuperación, destacando l’amenorgamientu significativu de la Educación Infantil, cola perda de 9 places de plantiya, que se suman a les 29 que se perdieren el cursu pasáu, pesi a la continua denuncia de necesidaes de profesoráu de sofitu que se vien faciendo dende los centros educativos.
Dende SUATEA denuncien que’l zarru d’unidaes en 3 produz un efectu dominó pa los cursos vinientes “que desmantela la escuela pública mientres se caltien l’espilfarru subvencionando con dineru públicu los centros privaos por aciu conciertos”. Acusen al Conseyeru de realizar declaraciones ermes, presentándose “comu adalid de la ensiñanza pública, cuando na práutica ta utilizándola comu subsidiaria de l’alcordada, nun apostando, nin siquier, pol caltenimientu de lo que yá hai”.
Pal sindicatu d’educadores asturianos, les polítiques d’aforru nieguen la posibilidá d’ameyorar la calidá “aplicando criterios d’axuste que siguen na llínea d’estrumir a un profesoráu que realiza’l so trabayu n’unes condiciones que son de les más precaries de too l’Estáu Español” refiriéndose con ello al sueldu y horariu lleutivu.
El fechu de nun medrar la plantiya, per otra parte, fai práuticamente invidable cumplir l’alcuerdu d’amenorgamientu de la xornada lleutiva a 18 hores, que ta roblada con toles Organizaciones Sindicales en Mesa sectorial.

Nuria Prendes

This work is licensed under a Creative Commons Attribution 4.0 International License.