Consecuencies del cientralismu: dende Madrid albidren que naide meyor pa deprendenos a curiar de la nuesa ñatura y ensiñamos la nuesa fauna y flora qu’una empresa ayena dafechu a la nuesa realidá

GRI ye la empresa escoyía pa insertar llaboralmente a desemplegaos/es  n’emplegos mediuambientales en Galicia y Asturies, al traviés del programa “Labora Verde ‘18”. Con sede’n Valladolid, GRI tien filiales en Castiella, Catalunya, Euskalerría y Madrid

Trátase d’un proyeutu de la fundación Biodiversidá (Ministeriu pa la “Transición Ecolóxica”) cofinanciáu pol Fondu Social Europeu, nel que participarán alrodiu de 200 desemplegaos -pente asturianos y gallegos- que recibirán formación personalizao pa la orientación al emplegu, participando en talleres de prospeición d’empreses pa la so inserción llaboral n’emplegos del seutor medioambiental nos entornos xeográficos nomaos. Paez ser qu’hai falta dir a Valladolid p’alcontrar una empresa que seya quien a informanos sol nuesu mediuambiente y les empreses asturianes.

L’envís del programa ye duple.

Pel un lláu, GRI reconoz que “Actualmente tanto Asturies comu Galicia alcuéntrense’n serios problemes mediuambientales que afeuten a la diversidá de les sos zones y poro tanto a espacios protexios. Pa poder ralentizar esti deterioru y llegar a la so reversión, les empreses necesiten incorporar a les sos plantiyes personal sensibilizáu y cualificáu. Estos trabayaores tendrán de saber xestionar afayaizamente la variable mediuambiental, que inclúi la xestión de residuos, emisiones a l’atmósfera, arramaos y la llimpieza y restauración afayaiza de montes, con flora y fauna autóctona”. Acuéi, nun voi quitayos razón, hai serios problemes mediuambientales, y vienen de la man d’eses empreses que supuestamente van contratar xente, empreses perfechamente coscientes de lo que faen y conoceores de comu evitalo. No que cinca a la xestión de montes ¿De verdá necesitamos n’Asturies que vengan de Valladolid a sensibilizanos pa col nuesu padrimoniu ñatural y ensiñanos a xestionar los nuesos montes, la nuesa fauna, la nuesa flora? el programa ta especialmente empobináu a los moraores de fasteres rurales o protexies ¿Daveres la xente los nuesos pueblos perdió tanto de la so cultura tradicional comu pa que tengan que venir a ensiñalos a curiar el monte?.

Pel otru, l’envís ye conseguir contrataciones; ta previsto un 15% d’inserción real, ello ye, más o menos 30 persones en total pente Asturies y Galicia, con suerte unes diez n’Asturies, pa lo que contratamos un equipu de fuera, eliminando de man la posibilidá d’emplegar direutamente a cuasi el mesmu númberu d’asturianos cualificaos pa la llabor n’emplegos aseguraos y de calidá.

Llucía F. Marqués

This work is licensed under a Creative Commons Attribution 4.0 International License.