Les redes sociales enllénense de sofitos a la solicitú de reconocimientu de la Cultura Sidrera Asturiana comu Padremuñu Cultural Inmaterial de la Humanidá

La cultura sidrera asturiana foi declarada Bien d’Interés Cultural de calter inmaterial en 2014. Destácase nesta declaración que la cultura sidrera asturiana constitui una manifestación que comprende práutiques sociales, rituales y eventos festivos, asina comu tradiciones orales, paisaxes culturales y oficios tradicionales, configurándose comu ún de los elementos identitarios de mayor fuercia del país.

Depués d’esi primer pasu de proteición llegal  n’Asturies, acordóse por parte del gobiernu asturianu, aniciar los trámites para consiguir la so inclusión na llista del Padremuñu Cultural Inmaterial de la Humanidá. Sicasí, la candidatura entá nun foi aceutada comu tal por parte del Ministeriu de Cultura español, que ye l’organismu que tien de presentala ante la UNESCO y que nun cuenta incluyir la sidre, polo menos esti añu, desaniciando la esperanza de presentala en primavera del 2019, comu taba previsto pola Conseyería de Desendolcu Llocal.

Ante esti nuevu contratiempu, la conseyería decidió entamar un plan de sofitu a la candidatura, que foi presentáu oficialmente el 16 de Xineru y que consiste nuna serie d’actividaes enfotaes n’implicar a la ciudadanía nel pidimientu a la UNESCO. Pa ello, ta creándose una rede d’embaxadores de la sidre, que ya cunta con 24 persones o asociaciones comprometies col proyeutu repartíes n’once conceyos. La recoyida de robles lleva tres dies furrulando, algamando una perbona rempuesta pente los asturianos, pero ye preciso que seya multitudinaria si se quier facer aportar el mensaxe dica la UNESCO. Pa participar hai dos opciones: roblando n’internet o poniéndose’n contautu con cualquiera de los embaxadores pa roblar nun de los llibros destinaos a esi fin.

Tamien se tan repartiendo pegadielles pa que los establecimientos hosteleros y comerciales puedan visibilizar el so sofitu.

Nuria Prendes

This work is licensed under a Creative Commons Attribution 4.0 International License.