Si los socios tan d’alcuerdu, un empresariu nixerianu afincáu nos Estaos Xunios podría ser el qu’apurriere los fondos que precisa’l club asturianu pal so espoxigue

Esti vienres cellebraráse un Conceyu Estraordinariu nel Salón d’Actos de la Casa Cultura “Gaspar García Laviana”, en L’Entregu, na que s’informará a los socios sobro les posibles inversiones, abriéndose darréu un alderique y posterior votación.

L’inversor ya visitó les istalaciones y caltuvo conversaciones colos miembros del Conceyu de Samartín del Rei Aureliu, seique L’Entregu nun yera la única opción que baraxó: el Real Avilés o San Claudio, n’Uviéu, foron otros dos equipos que foron consideraos y colos que se punxeren en contautu. Sicasí, si los socios asina lo apreben, l’escoyíu ye L’Entregu.

En casu de que los socios s’amuesen favoratibles a aceutar la inversión esterna, el proyeutu ye reforciar l’equipu con tres o cuatro xugadores de nivel, de manera que s’algame’l finxu d’ascender l’equipu a Segunda B. Tamién se fomentaría’l fúbol bas, creando una escuela de fubolistas na que nun descarten traer xugadores de fuera d’Asturies, pa los que se costruiría una residencia.

José Luis “Pepín” Cueva,  presidente de L’Entregu, albidra qu’esta ye una perbona noticia, y que velo “perfecho, porque la inversión sedría mui bona pal club y pal conceyu”.

Nel Dos Santos

This work is licensed under a Creative Commons Attribution 4.0 International License.