El Relator Especial de les Naciones Xuníes sobro cuestiones de minoríes guetó información de primer man pa emitir un informe nel que se recoyerá la situación de los drechos llinguísticos de la llingua asturiana

Nun ye la primer vegada que l’asturianu ye reconocíu a nivel internacional. Nel añu 2.009 la UNESCO incluyía la llingua llariega nel Atlas de llingües en pelligru de desapaición, alertando de que “La desapaición d’una llingua conduz a la desapaición de delles formes de padremuñu cultural inmaterial y del llegáu invaluable de les tradiciones y espresiones orales de la comunidá que la fala… Asinamesmo, la pérdida de los idiomes indíxenes va tamién en detrimentu de la biodiversidá, porque les llingües vehiculen numberosos conocimientos tradicionales sobro la naturaleza y l’universu”.

La cuestión de la discriminación de los asturfalantes ya fore llevada por Iniciativa pol Asturianu ante la ONU nos años 2014 y 2015 y de magar el 2.015 el tema foi tratáu en delles ocasiones nel Parllamentu Européu, de la man tantu d’Iniciativa comu d’Andecha Astur, siempres nel marcu de les llingües europees minorizaes (ello ye, que la so desapaición nun ye natural nin casual, sinon que tan siendo menaciaes por otra o por otros motivos).

Nesti casu torna a ser  Inaciu Galán, presidente d’Iniciativa, el que caltuvo -sigún anunciaron al traviés de nota de prensa recoyida por Europa Press-, un alcuentru con Fernand de Varennes, Relator Especial de Naciones Xunies sobro cuestiones de les minoríes, pa day a conocer la situación de los drechos llingüísticos de los falantes d’asturianu.

Galán desplicó la situación de la llingua nel ámbetu educativu, nos medios de comunicación públicos y mui especialmente nel ámbetu llegal, apurriendo a Varennes datos concretos sobro la falta de reconocimientu oficial del asturianu n’Asturies y Llión y de la fuerte demanda social a favor de la Oficialidá. De magar esta información y otra que s’apurrirá n’informes escritos pa completar lo más posible los conocimientos sobro la situación del asturianu, la ONU emitirá prósimamente un informe sobro la situación de los drechos llinguísticos nel  país.

This work is licensed under a Creative Commons Attribution 4.0 International License.