Llucía F. Marqués

Llueve n’Asturies.

Na nuevo, toos sabemos que n’Asturies llueve, y muncho

Orpina, orbaya, hai muga, llueve, cai un xarabatu, un bastiazu, échenlo a calderaos, xaraza… la bayura de términos cola que definimos la cayida del agua amuesa lo avezao de la mesma. Por ello siempres tuvimos preparaos pa la lluvia, col granu n’alto protexío n’horros, con cases a cuatro agües, colos edificios lloñe de tarrenes inundables. Les precauciones pueden y deben tomase, porque sabemos que n’Asturies llueve. Col pasu’l tiempu los conocimientos son más, hai arquiteutos, xeólogos, inxenieros, xente preparao pa saber lo que ye seguro en casu de lluvia o non. Les coses pueden facese bien.

Entos ye cuando pierde xacíu lo qu’asocede esta selmana. Comunicaciones cortaes, colexos presllaos, imáxenes dantesques de víes nel aire y rios peles cais, hospitales  y xeriátricos vaciaos d’urxencia ante l’agua, cuatro muertos.

Cuatro muertos.

Pola lluvia, n’Asturies.

Dos d’ellos, pol mal estáu de les carreteres, otru, pola falta de control de los rios desbordaos y un cuartu por un argayu.

Estes coses pueden evitase. Claro qu’eso implicaría tener en bones condiciones les carreteres y vies, controlar posibles argayos, contratar espertos, curiar de que nun se costruya en tarrenes inundables y tomar midies nes costruciones que ya tan en llugares pelligrosos, tener equipos d’emerxencia eficientes, con medios y personal abondo… muncho trabayu, sobromanera teniendo en cuenta que les fasteres más vulnerables son les de montaña, esa desdexada fastera rural ensin grandes núcleos urbanos, que tan pocu esmolez en Madrid.

This work is licensed under a Creative Commons Attribution 4.0 International License.