Pa munchos, les pallabres de Javier Fernández “encomiando’l llabor de la Brigada de Rescate” son una tomaura de pelu y la ufierta d’un premiu Princesa, una ofiensa

“Tornar a abrir toles mines n’Asturies, ya que muncha xente quedó na cai con familia al so cargu. Esi sedría el mayor reconocimientu”. Con esi cenciellu testu se pidi’l sofitu a los mineros na páxina Change.org, retrucando con ello a la pidición que dende España s’espardió estos díis pel mesmu mediu, reclamando la concesión del premiu Princesa pa la Brigada, contraponiéndose a esta y recoyendo’l clamor popular: nun quieren un premiu que representa tolo que fundió la mina, quieren la reapertura de les mines y recuperar los sos puestos de trabayu.

Nel trabayu de rescate del cuerpu del rapacín, que valió pa tener en vilu a tol estáu dos selmanes, los mineros amosaron los que son los sos valores: nun dexar a naide atrás, nun rendise, dalo too y caltenese al marxe del circu mediáticu. Los mesmos valores qu’amosaron siempres nel so trabayu y nes barricaes, fuelgues y kilométriques marches.

Cuando lluchaben pol futuru d’un país yeren terroristes, agora qu’acabaron con ellos, recién presllada la cabera mina quieren facelos unos heroes. Los mesmos que roblaron el preslle los pozos prometen agora la continuidá de la Brigada Minera de Rescate, una llimosna pa nun quedar tan mal. Coses de “El Mudu”.

Nuria Prendes

This work is licensed under a Creative Commons Attribution 4.0 International License.