Les cuentes salen soles: si nun se crea emplegu y hai 9.000 paraos menos ye que colaron d’Asturies o pasaron de la edá llaboral

Asturies torna ocupar el caberu puestu nel llistáu de tasa d’actividá del estáu nel caberu informe de la Encuesta de Población Activa (EPA), lo que quier dicir que ye’l puntu del estáu onde menos porcentaxe de les persones n’edá de trabayar tienen un emplegu, en concretu pocu más del 50%. Los trabayos esistentes, amás, amuesen un nidiu enclín a la precarización.

Pal “Principado” la tendencia ye bona, dicen qu’hai qu’enfotase na baxada del paru y nun dai más vueltes.

La EPA recueye tamién, ye cierto, un descensu de 3.700 paraos nel caberu trimestre, 9.000 nel añu, dexando’n 57.600 el númberu de persones apuntaes al SEPEPA que viven n’Asturies.

Esta baxada, puesto que nun se puede achacar a creación d’emplegos, namás puede desplicase cola desapaición de persones, polo menos de persones n’edá llaboral. Los datos oxetivos espeyen un descensu en picáu de la población moza asturiana, forciada a emigrar a paises onde la creación d’emplegu seya un fechu y non una encuesta malinterpretada por una alministración que prefier siguir considerándolos “lleendes urbanes”.

Nuria Prendes

This work is licensed under a Creative Commons Attribution 4.0 International License.