Marcos A. Fernandi
L’ Asociación de Directoras y Gerentes en Servicios Sociales, vien d’espublizar un informe sobro lo qu’invierten les ciudades de más de 20.000 habitantes en Servicios Sociales, y ¡¡sospresa, sospresa!! nel casu d’Asturies denguna algama los 40 € por presona y añu, lo que supón que tan a lo cabero la cola nestos servicios, a sieglos lluz de Errentería (EH Bildu) que ta de cabezalera con 275,74 euros por presona y añu
Los Servicios Sociales son el conxuntu servicios y actuaciones orientaos a meyorar el bientar social de la ciudadanía al traviés de la información, atención y sofitu a les presones y los colleutivos vulnerables, lo que tendiendo en cuenta qu’Asturies ye cabezalera a nivel européu en suicidios, que ún de ca venti asturianos sobrovive col salariu social y qu’un 20 por cientu de los neños asturianos viven en situación de probitú o riesgu, daríe que camentar qu’esos Servicios Sociales son prioritarios n’Asturies.
Pa enriba, de les siete poblaciones que sobropasen los 20.000 habitantes (Xixón, Uviéu, Avilés, Siero, Mieres, Llangréu y Castrillón), en seyes d’elles los gobiernos de conceyu son de “izquierda”: Uviéu PSOE-Podemos-IU, Avilés PSOE, Siero PSOE-Foro, Mieres IU, Llangréu IU-Somos y Castrillón IU, lo que daríe que camentar que debieren tener una especial sensibilidá precisamente con eses presones y colleutivos vulnerables; pero la rialidá amuesa que la so política nun pasa de ser propaganda y posturéu ensin denguna intención d’aplicación práutica, talamente como pasa cola Oficialidá de la llingua asturiana, la fiscalización de los chiringos del Principado, o l’anunciada auditoría de la delda pública…
Agora bien, lo cierto ye que dende la perspeutiva de quien aplica n’Asturies polítiques empobinaes a forciar la emigración de la mocedá, nun tien munchu xacíu aplicar midíes sociales que faciliten el caltenimientu d’unos mínimos de calidá de vida que facilitaríen la so resistencia a colar del país y entós, claro ¿pa qué gastar en Servicios Sociales?
This work is licensed under a Creative Commons Attribution 4.0 International License.
