“Nun podemos permitir que se dean pasos atrás na presencia del asturianu nos espacios municipales”

“Al igual que l’asturianu s’alcuentra presente nes campañes d’otres empreses y entes públicos del conceyu, esiximos un usu normal del idioma nes campañes de esporte”

Xuan Fernandi, representante d’Iniciativa pol Asturianu nel Conseyu Asesor de la Llingua, dixo güei que “dende Iniciativa pol Asturianu pidimos al Conceyu de Xixón mantener la cartelería n’asturianu y una mayor presencia del idioma nes sos campañes esportives”.

“Na nuesa ONG recibimos l’avisu de que pelo menos nuna piscina municipal del conceyu retiróse la cartelería n’asturianu, desconociendo los mesmos trabayadores del espaciu cuálu yera’l motivu. Dende Iniciativa pol Asturianu pidimos que nun se dean pasos p’atrás na presencia del asturianu nos centros públicos de Xixón. Nun podemos permitir que se dean pasos atrás na presencia del asturianu nos espacios municipales y que les campañes incumplan l’usu de la toponimia oficial y del asturianu, tal y como s’establez nel Plan de Normalización aprobáu pa esti mandatu y qu’otres conceyalíes tán cumpliendo. Esto nun ta asociendo na campaña “En Gijón el deporte siempre contigo”, que se pue ver nestos momentos pela cartelería urbana de Xixón y en munchos otros aspectos, como la visibilidá del topónimu nos estadios y polideportivos y nes equipaciones deportives patrocinaes, onde pasu ente pasu foi desapaeciendo la forma Xixón, presente dende va años” apuntó Fernandi.

P’acabar el vocal d’Iniciativa pol Asturianu señaló que “va unes selmanes felicitábemos a EMTUSA pol so apueste nel usu y presencia de la llingua asturiana, güei animamos a la Conceyalía d’Esportes y al Patronatu Esportivu Municipal a facer un usu igual que la empresa de tresportes. L’asturianu tien de tar con normalidá en toles estayes municipales”.

Redaición InfoAsturies

This work is licensed under a Creative Commons Attribution 4.0 International License.