InfoAsturies.- Tenemos con nos a Paulu Arboleya, escoyíu Secretariu Xeneral d’Andecha Astur nel caberu Conceyu Nacional. Anantes que na, prestaríamos que mos cuntare un resumín de lo tratao nesi Conceyu

Paulu Arboleya .- Foi un Conceyu ampliu ya intensu, abarcó dende les reformes estatutaries que permitirán una mayor tresparencia, si cabe, del furrulamientu d’Andecha, fasta l’alderique abiertu sobro’l programa elleutoral pasando pola redefinición de les llínies básiques del partíu y pola nuesa participación nes elleiciones nacionales, europees y de conceyu.

IA.- Comu nos dices, un de los principales puntos que se trataron nel C.N. foi la redefinición de les llínies básiques o puntos mínimos d’Andecha Astur, ¿por qué yera esto necesario?

P.A.- Bono, les formaciones polítiques tiene qu’adautase per un llau a la evolucion de la sociedá y tamién a la so propia realidá.  Poro, dempues d’unos años yera momentu d’adautar los testos que mos definen a eses nueves realidaes.

IA.- Fales d’adautase a la realidá de la organización ¿En que momentu s’alcuentra agora mesmo’l vuesu partíu?

P.A.-Dempués de un tiempu de reorganizacion, llego’l momentu d’espeyar públicamente esi trabayu que llevamos desendolcando internamente y pa ello el primer pasu necesariu yera precisamente facer esti Conceyu Nacional onde s’espeyare la nueva realidá de la organizacion. Tamos nun intre de xorrecimientu importante, de recuperación de militancia y tamién de munchu trabayu… garrando fuercies.

I.A.- ¿Qué ye lo qu’ufre Andecha Astur al pueblu asturianu?

P.A.- Andecha Astur nun ye mas que una ferramienta pa poder algamar la reconocencia de los drechos hestóricos que nos correspuenden como pueblu, dende los drechos llingüísticos a los políticos, sociales y económicos; ye perimportante la reconociencia de estos drechos y la posibilidá d’exercelos con total normalidá. La realidá ye que dende Madrí impúnxosemos un estatutu y el pueblu asturianu nun pudo nin siquier votalu. Nós ufrimos un proyeutu viable de futuru pal Pueblu Asturianu nel que se dean rempuesta a los sos problemes y pruyimientos, dende Asturies pa los asturianos, ensin inxerencies esternes.

IA.-Nel vuesu discursu repetís muncho’l términu de “soberanía nacional” ¿Pues desplicar a los lleutores esi conceutu?

P.A.-La soberania nacional nun ye más que’l drechu, nesti casu del pueblu asturianu de decidir sobro’l so presente y el so futuru en llibertá. Esto ye dalgo que vien ñegándose al nuesu pueblu dende fae yá endemasiao tiempu.

IA.- Nel conceyu falóse tamién del prósimu procesu elleutoral, tanto nacional comu européu y de conceyu ¿Repites comu candidatu pa les elleiciones nacionales?

P.A.- Non yo nun voi repetir pa estes elleiciones. La idega ye espeyar la problemática de la emigración nes llistes , elixendo a candidatos que viven fora del pais.

IA.- N’Europa presentaisvos de nueu con una coalición de naciones ensin estáu ¿Cómo valores la vuesa participación na cabera llexislatura con Los Pueblos Deciden?

P.A.-. El tratu que recibimos na coalicion ye perbonu y eso permitemos trabayar nuna serie de problematiques asturianes. La posibilidá de cuntar con eurodiputáu supón otra ferramienta de trabayu que permite frenar les politiques del gobiernu del principáu en temes comu l’esfarrapamientu ambiental, la contaminación y nesta llexislatura, cola presencia de Josu na comision de llingues amenorgaes, los drechos llingúisticos.

IA.-¿Qué novedaes apurre Agora Repúbliques?

P.A.- La principal noveda ye la presencia de los compañeros catalanes de ERC, polo demás el trabayu internu nun camuda res y va permitinos seguir cola llinea que llevamos trabayando, principalmente como dicía, la contaminación y la reconocencia de los drechos llingüisticos.

IA.-La valoración del panorama européu que facía Josu Juaristi nel Conceyu Nacional ye prieta enforma, ¿compartes esi esmolecimientu de so pola evolución de les fuercies facistes n’Europa?

P.A.- Si, ta nidio, pal que non lo tuviera, que´l facismu enxamas morrió, pue que nun tuviere visible pero  esperaba pola so oportunidá y agora tienla y va aprovechala.

IA.- Tornando a Asturies, yá hai ganes de conocer el vuesu programa pa les elleiciones nacionales, ¿Cuándo podremos velu?

P.A .- En breve, tamos trabayando nelli p’apurrir soluciones concretes a los problemes que carez el pueblu asturianu.

IA.- ¿Pues facemos una esbilla de los principales puntos qu’inclúi?

P.A.- La llínia xeneral del programa pasa pola recuperación de la soberanía, como solución a munchos de los problemes que carecemos nesta domina. Amás pretendemos la recuperacion del texíu productivu asturianu, poniendolu al serviciu del nuesu pueblu, y non embaxo’l porgüeyu d’empreses, cuasique toes asitiaes fora’l nuesu pais.  Tamién fadremos propuestes concretes pa recuperar el campu asturianu, que lleva años castigáu polos gobiernos españoles n’Asturies, nesti sen queremos facer una apueste pol coperativismu.

Sicasí, una de les carauterístiques del nuesu programa pa estes elleiciones ye que queremos abrir un alderique cola sociedá asturiana alrodiu d’elli, y pa ello pronto sacaremos na nuesa páxina ueb los sos puntos principales, cola posibilidá de que los ciudadanos apurran les sos idegues y puntualizaciones a los mesmos pa ser consideraes dientru del nuesu programa elleutoral.

This work is licensed under a Creative Commons Attribution 4.0 International License.