La Coordinadora Ecoloxista d’Asturies tornó denunciar énte la Conseyería d’Infraestructures del “Principado” y al Conceyu de Villaviciosa la contaminación que carecen los vecinos y comerciantes que viven na redolada de la empresa Derivaos Llácteos de Villaviciosa

Los fuertes golores son la principal quexa de los vecinos de les cais colindantes, anque les emisiones de partícules al traviés de les chimenees de la factoría tamién son orixe de molesties, una y bones la ropa, los coches y les ventanes apaecen davezu enllordiaes de partícules blanques, presuntamente procedentes del procesu de lleche en polvu que se realiza na empresa.

La C.E.A denuncia que la insuficiente depuración de les agües nes instalaciones de la central deriva nel arramáu directu de les agües, sueros y borrafes llíquides procedentes de los procesos direutamente al coleutor municipal, xenerando una fuerte contaminación olfativa que denota una importante carga orgánica nel mesmu. Recuerden tamién que l’antigua factoría cuntaba con una depuradora, anguañu en desusu, qu’evitaba estos problemes.

Poro, soliciten a les alministraciones que nun se retrasen en comprobar los graves fechos que denuncien los vecinos, fechos que yá treslladaron delles vegaes a los organísmos competentes ensin que tomaren midíes pa desaniciar estos problemes.

Redaición InfoAsturies

This work is licensed under a Creative Commons Attribution 4.0 International License.