Andecha Astur desixe que se faiga respetar el Plan Forestal, y la puesta en marcha de lleis asturianes que frenen esta invasión, asina como ordenances de conceyu que protexan los montes asturianos, afalando la recuperanza de les especies autóctones y desaniciando los ocalitales
La campaña, entamada por Ence, consiste n’incentivos pa l’anovación de los ocalitales más antiguos con nuevos llantíos. Pente les midies previstes p’afalar el llantáu de nuevos árboles tan les bonificaciones nel preciu la maera ya’l regalu de llantones. Dende Andecha denuncien qu’esta campaña implica un incumplimientu del Plan Forestal, una y bones la superficie dedicao a esti cultivu supera ya les cifres previstes pal 2060 nel nomáu plan.
Les revindicaciones escontra el cultivu d’esta especie arborícora viniente d’Australia remóntense a décades atrás, cuando entamaron a conocese’l dañu causáu por esta especie invasiva y foriata, qu’escosa la tierra ensin apurrir el necesariu abellugu y alimentu a la fauna y flora, robando recursos a les especies autóctones y multiplicando bultablemente’l riesgu de quemes. Amás, remembren dende A.A “l’ocalital, como tou monocultivu, introduzmos nuna política económica tercermundista de dependencia y esplotación del mediu de forma non caltenible, ensin ser tampocu la opción más rentable d’ente los posibles aprofitamientos económicos del monte asturianu”.
Pa la organización política, el fechu mesmu que dende’l “Principado” y los partíos de la Xunta Xeneral se permita ya incluso s’afale la puesta en marcha d’esti proyeutu evidencia la influyencia de los porgüeyos de la papelera. Tamién acoten el comportamientu de dalgunos grupos, “comu IX o Podemos, que pesia declarase públicamente contrarios al ocalitu, nun tomen midíes pa frenar estos llantíos, nin a nivel d’Asturies onde vienen d’apreba-y los presupuestos a Javier Fernández, nin a nivel de Conceyu onde nun apreben –ellí onde tienen mayoríes pa ello- les Ordenances de Conceyu precises pa torgar los ocalitales”.
Redaición InfoAsturies
This work is licensed under a Creative Commons Attribution 4.0 International License.
