Nun ye namás el descensu de la natalidá y la fuxida de la mocedá, ye la solitú na que viven más del 30% de los asturianos (el porcentaxe de presones que viven soles nel so llar n’Asturies), coles families rotes pola emigración y l’abandonu de los pueblos, les ruines espeutatives de poder llegar a formar una familia y la necesidá de ciñu nuna sociedá desencantada y castigada tamién no emocional, lo que lleva a esta sostitución de lo humano polo animal
Alrodiu de 164.000 perros censaos, el 50% más que va cinco años, 10.000 más en solo un añu. El tremendu espoxigue de los animales de compañía ye namás comparable al descensu en númberu de presones, y nesi sen alcontramos el datu más esmoleceor: hai más perros n’Asturies que la suma de rapacinos y mocedá, más perros que menores de venti años.
Comu pronosticaben nes películes d’animación (¿daquién vió “Bebé jefazo”) el ciñu de los asturianos deriva a les mascotes, que vienen a ocupar el puestu de los fios, ya en dellos casos, de les pareyes. Nun ye aneudótico, nin ye casual. Pa la xente más mozo, n’actual coxuntura, tener un fiu plantega munches duldes, un perru ye un probe sustitutu, pero un riesgu asumible. Pa la xente vieyo (remembremos, la gran mayoría de la población asturiana) ye en munchos casos la única posibilidá de compañía: el númberu de persones que viven soles, especialmente muyeres mayores de 64 años, medra añu tres añu. En tolos pueblos hai perros, na mayoría d’ellos ya nun hai reciella.
Que la xente tenga perros -o gatos, o periquinos, o pexes de collores- nun ye en si un datu negativu y de fechu la proporción de mascotes n’Asturies sigui siendo menor que n’Europa. Pero nun se puede dispreciar el datu comu síntoma d’un mal mayor: una población avieyao, solo, en munchos casos aisllao y allonxao de fios y ñetos, que busca compañía nos animales y una mocedá incapaz de consiguir la estabilidá precisa pa entamar una familia, col miéu a un futuru inciertu nel aire, ensin escaecer comu factor emportante la problemática sicolóxica resultante de toa esta tensión, faciendo ca díe más abegoses les relaciones humanes de calidá.
Llucía F. Marqués
This work is licensed under a Creative Commons Attribution 4.0 International License.
