Un datu pa reflesionar: los caberos mapes llingüísticos amuesen que más del 50% de la población asturiana tien como llingua materna l’asturianu, con fasteres nes que la llingua española ye la materna de menos del 20% de los sos habitantes. Ye la posterior presión social y de los medios de comunicación la que lleva a rapacinos asturfalantes a adoutar comu propia la que de fechu ye la so segunda llingua

Dende la Redaición d’InfoAsturies nun podemos dexar pasar el díi de güei ensin reclamar pa la llingua materna de munchos de los nuesos llectores el llugar que-y correspuende.

A lo llargo la selmana, y mui especialmente nel díi de güei, cellébrense a nivel internacional los actos d’homenaxe a les llingües maternes: charres, obres de teatru, conciertos, esposiciones… eventos que faen rellumar la bayura que curia ca una de les llingües, ya qu’esiste una fuerte relación pente la manera na que se fala y la forma de percibir la realidá.

Pa la nuesa llingua, nesti intre hestóricu nel que los asturianos entá tenemos ensin reconocer el drechu fundamental al propiu idioma, hai namás un homenaxe posible: reconocer plenamente’l so drechu a esistir, al traviés de la concesión del estatus d’Oficial que tantos años lleva reclamando’l Pueblu Asturianu, comu primer pasu pa la so recuperación y dignificación.

This work is licensed under a Creative Commons Attribution 4.0 International License.