Esti miércoles 13 de febreru entregóse nel Consuláu d’Arxentina en Madrid la denuncia de trés hermanos que presenten el casu de la desaparición de so güelu, Enrique Suárez Ferrera, mineru vecín de La Rina (Samartín del Rei Aurelio), p’axuntalu a los demás casos que formen parte de la conocida como Querella Arxentina

El 13 d’abril de 1948, cuando diba a trabayar a la mina,  a Enrique Suárez prendiólu la Guardia Civil. Una vecina cuntó-y a la muyer d’Enrique, Manuela Nava, que viere a los guardies llevalu camín del monte de Peñamayor. Cuando dos fíes d’él trataron de buscalu nesa dirección, nun les dexaron pasar y amenazáronles con llevales preses a elles tamién. Too paez indicar que’l cuerpu d’Enrique acabó tiráu nel Pozu Funeres con otres trés persones que tamién prendieron esi día: Jesús García Iglesias, de Les Felechoses, Silvino Díaz Méndez, d’El Xumíniz, y Ramón Rodríguez Argüelles, de La Camperona.

Los nietos d’Enrique piden la exhumación d’esa fosa pa tratar d’identificar los restos de so güelu. Enfótense en que la Xusticia arxentina pueda llograr “lo que la española niega sistemáticamente”, dicen nel so escritu.

Otra denuncia presentada nel 2016 dende Asturies tamién solicitaba la exhumación del Pozu Funeres, pol casu d’otru mineru, Erasmo Alonso Martínez, de Los Barreros (Llaviana), asesináu en 1948 y tiráu al pozu. De momentu,  gracies a un exhortu de María Servini de Cubría, la xueza arxentina qu’instruye la Querella, nel 2016 yá se pudo exhumar en Guadalajara una fosa común a petición d’Ascensión, la fía d’ún de los asesinaos ellí, Timoteo Mendieta.

Hasta agora, son 27 les persones y entidaes que se sumaron dende Asturies a la Querella Arxentina denunciando los sos casos, qu’afeuten en total a alredor de mediu millar de víctimes.

Redaición InfoAsturies

This work is licensed under a Creative Commons Attribution 4.0 International License.