Asturies ConBici ye una Asociación de ciclistes urbanos y cicloturistes d’alforxa que ñaz nel 2007 de la fusión de les dos asociaciones hestóriques de defensa de la bici n’Asturies: Tronchacadenes y Asturies Pedalea. El so enfotu ye llograr p’Asturies un modelu de ciudá y de comunicaciones interurbanes caltenible y pensáu pa les persones “onde la bici más el trasporte públicu nos faiga esfrutar ensin que sufra’l planeta. Necesitamos un mundiu nel que poder caminar y pedalear seguros, más caltenible, más sanu, más amable”, un enfotu que namás ye posible si cuenta col sofitu de la población, polo que abren les sos actividaes a quien quiera participar nelles.

Pa esti añu, entamen con una salida cicloturista de dureza media, con 36 km y delles cuestes pindies pente Lieres y Xixón. De magar entós, tan planeaes una media de diez actividaes por mes, la mayoría d’elles rutes cicloturistes que varíen de dificultá y llargor, dende los 21 km de la salida “Acompañando al Nora” esti mesmu mes dica la de 136 km que se fadrá n’ochobre pel Puertu San Isidro; pero tamién ufren otra triba d’actividaes, comu la escuela de bici p’adultos na que los que nun tengan muncho vezu puedan garrar soltura sobro les ruedes o la participación nel alcuentru de muyeres ciclistes del 5 al 7 d’Abril en Barcelona.