El so proyeutu, denomáu “StrepCryptPath”, recibirá fondos de la “European Research Council” pa continuar cola so investigación durante los prósimos 18 meses y nun descarten la creación d’una empresa bioteunolóxica n’Asturies

Cola xorreciente resistencia de los microbios y bacteries a los fármacos conocios, la investigación p’alcontrar nuevos fármacos colos que se yos enfrentar ye de vital importancia. L’équipu asturianu, que tien el so llaboratoriu na Facultá de Bioloxía de la Universidá d’Uviéu, ta trabayando nun nuevu métodu p’activar la produción masiva d’antimicrobianos na bacteria “Streptomyces”, de la que proceden de manera natural más del 80% de los antibióticos utilizaos anguañu. Esta macroprodución permitiría non solo una mayor gueta d’antibióticos, sinon, sobre tou, la investigación nel Streptomyces, ya que se cree que la mayoría de los antibióticos contenios nella tan por descubrir.

L’envís d’esti equipu, formáu poles científiques Baeatriz Gutiérrez, Natalí González, Gemma Fernández y Beatriz Rioseral, col profesor Ángel Manteca al frente,  ye esplorar la viabilidá industrial d’esti nuevu métodu de produción acelerada d’antimicrobianos na nomada bacteria, pa lo que cuenten cola financiación anicial de los fondos europeos de la “European Research Council” (ERC). Si los sos descubrimientos siguin el camín qu’esperen, nun descarten xenerar una patente o inclusu la creación d’una empresa bioteunolóxica, amosando la importancia d’invertir na investigación comu fonte de creación de riqueza y emplegu.

Llucía F. Maqués