Los trabayaores eventuales, fixos discontinuos o con contratos por obra/serviciu de menos de cincu díes tienen que trabayar fasta 141 dies más al añu p’algamar los mesmos drechos que los indefinios

Oskar Matute, diputáu por EH Bildu, formación cola qu’Andecha Astur forma coalición en “Agora Repúbliques”, presentó nel Congresu los Diputaos, en nome del partíu asturianu, una riestra d’entrugues referentes a la discriminación que suponen los contratos de curtia duración. Éstos enfréntense a mayores desixencies llaborales, teniendo que trabayar más p’algamar los mesmos drechos, tantu a la hora de facer el cálculu pa los Topes de Cotización diarios comu nel periodu de cotización reconocíu na vida llaboral.

Cola actual Llei Xeneral de la Seguridá Social, los trabayaores con contratu diariu pierden la parte proporcional a festivos, fines de selmana y vacaciones, lo qu’implica que, pa tener drechu a les mesmes prestaciones qu’un trabayaor con contratu fixu no que cinca a prestaciones, xubilación, baxes, etc. tendríen de trabayar los 365 del añu, mientres que’l indefiníu algama los mesmos drechos con 224 díes trabayaos. Esta discriminación súmase a una menor percepción salarial, mayor inestabilidá y precariedá que ya carecen la mayoría d’esta triba d’emplegaos.

Denuncien tamién que les ruines midies recién aprebaes y recoyíes pol Gobiernu del estáu nel Preámbulu del Real Decretu Llei 28/2018 de 28 d’avientu, y que foron publicitaes comu avances  pa“lluchar contra l’emplegu precariu y más concretamente contra l’abusu na cellebración de contratos temporales de curtia duración”, son en rialidá inferiores a les anteriormente reconocíes pol Tribunal Supremu en 2009 y 2010, polo que nun apurren dala novedá. 

P’Andecha Astur, “con esti cobarde cambiu de la Llei Xeneral de la Seguranza Social, el Gobiernu español nun gueta solucionar la inxusticia que carecen los trabayaores en cuantes al cálculu de les sos cotizaciones, nin acabar cola gran esplotación d’empresarios y ETTs con esti tipu de contratos temporales, sinón que -hipócritamente- el Gobiernu español lo que busca ye namá ameyorar un pocu la deficitaria recaldación de la Seguranza Social y engañar a los trabayaores presentándolo como que ye para beneficiu del trabayaor eventual”.

Redaición InfoAsturies

This work is licensed under a Creative Commons Attribution 4.0 International License.