En xineru ardieron 10’3 Hectarees de superficie forestal n’Asturies. De febreru entá nun hai datos disponibles. Marzu entama con 97 fueos ardiendo al tiempu. Sábese qu’hai un problema, el 46% de la superficie d’Asturies ye arboleda y ta en pelligru; la desidia de nun lo prevenir nin frenar fae al “Principado” tan culpable comu los qu’entamen los fueos
Pa los ecoloxistes, l’orixe de la mayoría d’estes quemes ta nel llevantamientu de los acotaos al pastoréu nes zones amburaes, y de fechu de magar esa midía, nel 2017, multiplicáronse los casos. Asturies ye l’únicu territoriu de la Xunión europea nel que se permite llevar el ganao a pacer nos tarrenos afeutaos pola quema, faciendo rentable los incendios y torgando la correcha recuperación de les biesques.
Los ganaeros deféndense argumentando qu’ellos son los primeros afeutaos poles quemes, son les sos cases les que pelligren ya en munchos casos el mesmu ganao ye víctima del fuéu.
Ta nidio que, por muncho que nun llueva, los árboles nun prenden solos y ya sean pirómanos, ganaeros, papeleres a la gueta maera o cenciellamente, xente que nun pescancia que “riesgu estremu” quier decir que baxo dengún conceutu se puede quemar la broza en prau, la man del ser humanu ta tres de la gran mayoría d’estes quemes.
Otros apunten comu causante d’estes foles d’incendios a una política forestal que sustituye la biesca autóctona -más resistente al fuéu y menos inflamable- por pinales y ocalitales, de los que se sabe que multipliquen el riesgu y la gravedá de los incendios.
Finalmente, los retayos nos medios y personal del cuerpu de bomberos, xusto cuando más dañu ta faciendo el fuéu, fae imposible la llucha efeutiva pa frenar les quemes.
En resume, tenemos foleaes d’incendios añales, más de 6.000 nos caberos cincu años, de los que cerca’l 90% son, sigún los informes de la Fiscalía de Mediu Ambiente del Tribunal Superior de Xusticia d’Asturies y los datos de les Brigaes d’Investigación d’Incendios del “Principado” d’Asturies (Bripas), prevocaos pol ser humanu, ensin que se persiga y castigue con fuercia a los culpables. Tenemos 61.300 hectarees d’ocalitos -y medrando- llantaes n’Asturies, qu’alimenten y dan puxu a les quemes, mientres el “Principado”, en llugar de desanicialos, sigui permitiendo y afalando’l so llantáu. Y tenemos, pa rematar, un cuerpu de bomberos insuficiente y con medios escasos pa enfrentase a estes situaciones d’emerxencia xeneralizada -qu’entamen a convertise en cotidianes, de tan repeties- y un gobiernu que se sienta a mirar y esperar que llueva.
Unos quémenmos y otros déxenmos arder.
Llucía F. Marqués
This work is licensed under a Creative Commons Attribution 4.0 International License.
