La móceda asturiana fadrá Fuelga estudiantil y de tardi un manifiestamientu percorrerá les cais d’Uvíeu reclamando polítiques urxentes escontra’l calecimientu global
Esti vienres día 15 de magar les 19h tendrá llugar una movilización na Plaza de la Escandalera (Uviéu), nel contestu la xornada de Fuelga Internacional pol Clima.
Asturies vive’n primer persona les consecuencies d’un cambeu climáticu qu’agrava los problemes de contaminación, tantu atmosférico comu acuifero, favorez les quemes, prevoca seques y torna les lluvies n’hinchentes descontrolaes. La mocedá asturiana quier “tener un futuru verdi, llimpiu y habitable, poro vamos salir a la cai esti vienres, por un futuru nel nuesu planeta, por un futuru n’Asturies”:
L’activista sueca Greta Thunberg, que lleva de magar el branu pasáu protestando frente al parllamentu suecu, ye la ispiradora d’esti movimientu, que convoca esti vienres fuelga estudiantil en más de mil ciudaes de noventa países de tol mundiu.
Les sos revindicaciones son cencielles ya urxentes “que se tomen midies darréu, efeutives y xustes pa la sociedá, escontra’l cambiu climáticu. Salimos a la cai pa revindicar el nuesu futuru. La mayoría los políticos nun tarán vivos en 50 años, nós si, nun podemos depender de los sos intereses y compromisos” declaren. Culpen al capitalismu de la situación d’emerxencia climática y alvierten de que namás priorizando les reformes que permitan finar cola contaminación perriba de los beneficios económicos podrá solventase esta situación “que yá nun almite más demora”.
Apartidistes ya ensin venceyu visible con dala organización, una de les coses que más destaca d’esti movimientu ye la so coordinación mundial: les aiciones de la fuelga del vienres tan coordinaes poles decisiones de 60 rapazos y rapaces aconceyaos n’Estrasburgu esta selmana baxo’l llema “Fridays for future”.
Llucía F. Marqués
This work is licensed under a Creative Commons Attribution 4.0 International License.
