Esti sábadu día 16 de marzu La Sala Telva de La Felguera va abrir les sos puertes a los ocho la tarde pa un conciertu de dos bandes amigues, Skontra y La Tarrancha. Dos bandes consolidaes nel tiempu, y ye que los primeros cumplen anguaño los 18 años años sobre les tables y los segundos 16
Skontra col so carácteristicu soníu punk-folk y lletres tanto en castellán como n’asturianu, cuenta na faltirquera con cuatro discos, amás d’una maqueta y la participación en distintos discos compilatorios. El so últimu trabayu “Foguera” asolellose yá nel 2015 y mientres esi tiempu foi presentáu en distintos escenarios del estáu y d’Europa.
Per otra parte La Tarrancha atópase presentando “Baillando con llokes”, el so quintu discu de llarga duración depués d’empecipiase con un discu maqueteru y de participar en dellos compilatorios, en dalgún de los cualos comparten espaciu con Skontra. Tal ye asina que la primer apaición de les dos bandes nun discu compilatoriu de llarga duración foi’l “ROCK´N´LLINGUA”, allá pol 2004.
Esti ye’l segundu conciertu de presentación de “Baillando con llokes” depués de que La Tarrancha lu presentara al públicu a finales d’avientu na sala Acapulco de Xixón. Un total de trelce cortes configuren esti “Baillando con llokes” nel que La Tarrancha vuelve al ataque con un nuevu discu de pura fusión, ensin fae-y ascos a nengún estilu musical, ensin miéu a purismos, nin a la necesidá de tener una etiqueta pa lo que se fai, y como nel so anterior discu, “Elefantes na cacía”, con muncha más fuerza, distorsión y enerxía que nos sos primeros trabayos. Les influencies y los estilos que s’aprecien nel discu van dende’l funk y el swing al punk-rock y al rockanroll, dende la música asturiana a los aires balcánicos o castellanos, con toques de ragga, rap y el so siempres presente ska, pero esta vegada, tollo, pasáu per una peñera mas punk.
Estos vieyos amigos van compartir escenariu, y músicos en dalgún de les temes, pero sobremanera van compartir calor, sudu y ritmu col públicu asistente al Telva, onde s’espera que s’espera que sía un pogo de principiu a fin y la xente nun pare de baillar como llokes.
Redaición InfoAsturies
This work is licensed under a Creative Commons Attribution 4.0 International License.
