El Conseyeru d’Infraestructures, Ordenación del Territoriu y Mediu Ambiente ya’l alcalde d’Allande, entrambos del PSOE, llegaron a menaciar a les families afeutaes pola falta de tresporte escolar y a proponeyos abandonar los sos medios de vida y vivir de los servicios sociales
Tres d’aconceyase coles afeutaes el mes pasáu y comprebar personalmente la situación d’abandonu nel que s’alcuentra la pista d’acesu a la Sierra El Valledor, ente les llocalidaes de Robledo y Aguanes (Allande), Andecha Astur acaba de solicitar l’apertura de dilixencies pola presunta responsabilidá -civil o penal- de Fernando Lastra -Conseyeru- y José Antonio Mesa Pieiga -alcalde d’Allande-. La denuncia, presentada énte la Fiscalía Superior d’Asturies, ciéntrase nel fechu de que pudieren tar incumpliendo les sos obligaciones competenciales y dañando drechos básicos de vecinos del conceyu Allande.
La situación féxose conocía de magar la ñegativa de tresporte escolar a dos families del pueblu al torgar que’l Consorciu de Tresportes proceda a llicitar la contratación d’un vehículu especial amañosu pa tarrenos montañosos, col envís d’atender la ruta de tresporte escolar que la Conseyería d’Educación reconoz ente les llocalidaes d’Aguanes y Robledo. Les families vense obligaes a treslladar elles mesmes a los sos fíos (12 km diarios) per una pista perpelligrosa, pa que puean coyer en Robledo l’autocar escolar que los lleva al Colexu Berducedo, doce km diarios per una ruta tan peligrosa que los tasis se nieguen a pasar per ella y qu’una de les families afeutaes fae ca díe n’asturcón, únicu mediu de tresporte del que disponen.
Por supuestu, la situación de la pista nun afeuta namás a los neños, sinon que’l so usu pon en pelligru a tolos vecinos, ganaeros, trabayaores forestales, carteros, trabayaores de telecomunicaciones… que se ven na obligación de percorrela.
La rempuesta de Fernando Lastra nun se quedó na denegación de drechos sinon que, sigún declararon los afeutaos, llegó calificar a estos vecinos d’antisistema y a menacialos públicamente cola intervención de la Fiscalía de Menores si los neños nun diben a escuela poles males condiciones de la pista, sobro too nel iviernu.
Otra opción que se dio a les families, esta vegada por parte de l’Alcaldía d’Allande y la Conseyería d’Infraestructures foi la de convidar a una de les familes a desfacese de la so fía, zarrándola sola de llunes a vienres na Escuela Llar d’Allande, onde sedría la única residente. Al pocu tiempu’l PSOE quinxo acabar cola tema ufriéndo-y a una de les families un pisu de proteición oficial en La Puela, obligándolos a abandonar el so entornu familiar, la so casa ya’l so mediu de vida y convidándolos a depender d’aides sociales pa vivir. La familia ñegóse, allegándo amás que yera una vulneración de la so llibertá a decidir onde vive.
Andecha Astur ve nesto un ñiciu más de la estratexa de despoblamientu de les esnales d’Asturies, de la que ye parte perimportante’l proyeutu d’Aria Central Metropolitana d’Asturies “La idega’l PSOE ye siempres la mesma: vaciar eses aldegues enantes qu’invertir lo necesario pa en caltener nelles condiciones de vida xustes y dignes”.
Precisamente, Andecha Astur presentó un vídeu entituláu “Aguanes. Cuandu se castiga a l’Asturies rural”, protagonizáu por Sureyna Muñiz vecina d’Aguanes, nel alderique que la organización entamó esti llunes nel Clú Prensa de La Nueva España, en Xixón, nel marcu d’un debate públicu sobro les dañibles consecuencies que tendría pa la nación asturiana llantar esa figura del Ária Central Metropolitana.
This work is licensed under a Creative Commons Attribution 4.0 International License.
