L’actu de presentación de la coallición Agora Repúbliques, de la que forma parte’l partíu asturianu Andecha Astur, cuntará cola presencia de representantes d’ERC y EHBildu
L’Antigua Escuela de Comerciu de Xixón sedrá l’escenariu del actu de presentación d’ Agora Repúbliques, que tendrá llugar esti vienres 22 de magar les 19 hores. El mesmu entamará con una actuación musical a cargu’l grupu Fontoria; darréu, intervendrán Josu Juaristi, d’EHBildu, candidatu a Europarllamentariu por Agora Repúbliques y que ya representó a Asturies en delles ocasiones comu europarllamentariu de l’anterior coallición, “Los Pueblos deciden”, Pau Morales en representación d’ERC, y finalmente, Llucía Fernández, candidata al Congresu por Andecha Astur.
Agora Repúbliques, continuadora de Los Pueblos Deciden nel so proyeutu de dar un marcu común a les fuercies soberanistes d’izquierdes del estáu, preséntase a les elleiciones estatales del 28 d’Abril col envís de costituyise nun “alternativa política con posibilidaes riales de condicionar de forma efeutiva la política a nivel d’Estáu y avanzar nel procesu d’esaniciu de la monarquía española y l’aniciu d’un procesu costituyente de Repúbliques de drechos y llibertaes presonales y colleutives”. Tamién se presentarán a les elleiciones europees del 26 de Mayu, cuntando con ampliar la representación que ya tienen nel Parllamentu Européu y poder siguir asina representando a los estremaos pueblos y naciones del estáu español.
Andecha Astur ye la representante d’Asturies dientro d’esta alternativa, de la que formen parte fuercies soberanistes de Catalunya (ERC), Euskal Herría (EH Bildu), Aragón (Puyalón), Canaries (Ahora Canarias) y Galicia (BNG).
Redaición InfoAsturies
This work is licensed under a Creative Commons Attribution 4.0 International License.
