Tres d’una primer incursión en Madrid, y 2 feches más el pasáu mes de payares n’Ourense y Santander, la nueva sensación del soul d’alma gospel aporta a Asturies
Crudeza, interpretaciones dinámiques, y honestidá compositiva. Con eses cualidaes definen al nuevu fichaxe de Jalapeno Records, la cantante de blues Izo FitzRoy. El 6 d’abril l’Asociación Músicu-Cultural Bocanegra ufierta la oportunidá d’escuchala en directu, na so sede de Samartín de Vallés (Piloña). Les puertes van abrir a les diez y cuartu pa entamar el conciertu una hora más tarde. Les entraes pueden acutase de magar el nueve d’Abril, o dende’l día dos, pa los socios de Bocanegra.
Ñacida y criada en Llondres, la música de Izo ta influyida pol poder de les lleendes femenines del blues como Janis Joplin, al pie de la llírica sincera d’un soul men como Bill Withers, fundíu colos sos raigaños gospel dempués d’años canciando, lliderando y dirixiendo coros en xira.
Los sos cantares tán fechos pal direutu, lletres sinceres y convincentes sobro una base melódica. Pasa ensin esfuerciu de les versiones d’estudiu al direutu con una formación única de 7 músicos que nun ye l’avezada del soul, sinon que cunta con 3 coristes d’acompangamientu, al estilu gospel. Esti arsenal apurre un ramu d’armoníes perfeches pa la voz de Izo y el so trabayu a les tecles con esi arrecendor de jazz, estremándola de los sos contemporaneos n’emocionantes shows en directu.
La so música sonó en BBC 6 Music, BBC London, o nel prestixosu Today’s Top Tune de la estación de radiu anxelina KCRW. Tamién la presencia online en medios como Clash Magacín, Indie Shuffle, Eton Messy y La Belle Musique, o escrita en Blues & Soul, Echoes, Uncut, Classic Rock Magacín o Daily Express dan bona cuenta de la so calidá.
Mientres la so estancia en New Orleans dedicóse a componer y grabar el so debú “Skyline”, espublizáu por Jalapeno Records en febreru de 2017. La producción corrió a cargu del pesu pesáu Dr. Rubberfunk, que propunxéra-y por Twitter collaborar nel cantar “Day by Day”. Esti tándem creativu florió y lluéu creció dende una pista a un álbum apináu de gospel, templáu blues ya’l vintage groove funky del bon Doctor.
“Skyline” ye un emotivu garrapiellu de lletres con Izo compartiendo los sos sentires sobro desigualdá, depresión, salú mental y la muerte. Debuxa la so esperiencia personal na perda de los sos seres queríos, reparando la probitú de l’América fonda. Pero más allá de tou eso, el mensaxe del discu ye ispiraor y positivu, de superar les lluches y buscar un futuru meyor.
Esto vese perfechamente nel primer corte del álbum, sobro la muerte d’una gran amiga so:
“I’m moving through the bad lands moving through the dark times,
I better keep my eyes on the skyline”.
This work is licensed under a Creative Commons Attribution 4.0 International License.
