El galipote del buque italianu Grande América ta espardíu en dellos puntos al norte del llitoral Cantábricu, ocupando unos 50 kilómetros cuadraos en tres grandes manches, una a 30 miyes de la costa francesa, onde ya tan preparaos los efeutivos pa facer frente a la marea prieta, otra na zona onde fundió’l barcu y una tercera frente a les costes asturianes, a l’altor de Ribeseya, con Nordés y desplazándose direición Oeste (ello ye, camín de Xixón).

El Grande América, que ya fore avisáu poles sos deficiencies na cabera revisión, tresportaba nel intre l’acidente más de 2.000 tonelaes de fuel, unos 2.100 veículos y cientos de tonelaes d’ácedu clorhídricu, funxicides ya otres sostancies tósiques. Bona parte d’esti cargamentu posa ya a más de 4.000 metros de fondura y la so tosicidá va ser dificil de torgar. El resto ta en camín y namás la direición y la fuercia los vientos determinarán en que parte de la costa Atlántica finarán, polo que tolos posibles destinos tendríen que tar sollertes y preparaos pa una rápida rempuesta.

Una de les tres manches avanza frente a la costa asturiana, a menos de 70 miyes (unos 100 kilómetros) de distancia, na vertical de Ribeseya. Sicasí, ye nel Gobiernu vascu nel que -col plan d’emerxencia en fase 1 activáu- se faen declaraciones tranquilizadores: nun aportará, de xuro, a les costes vasques. Asina que tranquilos. N’Asturies continúase col Plan en situación cero, d’avisu y xixilancia, lloñe del necesariu Plan de Rempuesta ante la contaminación del mediu marín en fase 2, de pelligru, lo que vien a ser a velo venir y cuntando pa retrucar a la previsible emerxencia namás col remolcador Alonso de Chaves, que ya participa nes llabores de llimpieza.

Nuria Prendes

This work is licensed under a Creative Commons Attribution 4.0 International License.