Dende la Rede Xixón Oeste faen una llamada al xacíu en rempuesta al artículu “Asturies, el meyor llugar del país pal turismu nel 2050 gracies al cambiu climáticu”, espublizáu por “El Comercio” esta selmana
Del Facebook de la Rede Xixón Oeste
Desertificación, estinción d’especies, inundaciones, incendios, enfermedaes… tou ello nun importa si va a venir el dineru’l turista
Al paecer, cuando el sur y el llevante se tornen nun infiernu de calor y seca y nin los turistes quieran dir allí, tendremos l’alternativa d’estrozar la costa cantábrica col mesmu modelu de turismu sobresaturáu y de folixa que tantu mal fexo al Mediterrániu y a les grandes ciudaes. Siempres cola escusa de les perres ya’l trabayu (mal pagáu y esplotáu) de la hostelería pa xustificalo tou.
Cuando’l cambiu climáticu desertifique la península ya’l turismu s’arruine decatarémonos de qu’enxamás debimos basar la nuesa economía nel seutor servicios y que tendríemos de tener invertío más n’investigación, nel campu y curiar los nuesos recursos hídricos.
Curiemos de la nuesa tierra y aboguemos por una economía caltenible.
This work is licensed under a Creative Commons Attribution 4.0 International License.
