El monumentu tinetense, d’enorme conteníu hestóricu, alcuéntrase nun llamentable estáu d’abandonu y desaniciu

Dos visitantes a les ruines del Monasteriu alcontraron, posada nuna de les columnes de los arcos del claustru, una mandíbula humana. Por agora desconozse si el restu de la cadarma s’alcuentra nos alrodios y la so procedencia, seique se trabaya con cuatro posibles opciones.

La primera, y menos probable ante l’aparente antiguedá de la pieza, ye que correspuenda a dalguna de les persones desapaecies nos caberos años. La segunda, que los restos procedan del mesmu campusantu del monasteriu, teoría que taría xustificada pol descomanáu deterioru del edificiu. Tamién podríen tar allí dende la época de la guerra civil. Finalmente, baráxase la opción de que procedan d’un desenterramientu reciente del cementeriu; teóricamente, los güesos procedentes de nichos vaciaos tienen de ser amburaos o enterraos en foses comunes, pero nun se descarta que’n dalgún casu se omita esa obligación.

Lo que ta nidio ye que les persones que notificaron l’hallazgu nun foron los primeros en topar la mandíbula, ya qu’esta taba colocada nuna de les columnes y perfechamente a la vista.

Arcaes nes que s’alcontró la mandíbula

El Monasteriu d’Obona, fundáu por Adelgaster, fiu del rei Silo, foi un importante cientru cultural y relixosu, siendo una pieza clave nel camín Primitivu de Santiago, pel que pasó Alfonso II el Castu y nelli alcontráronse los primeros documentos que faen referencia a la sidre, mencionándola comu métodu de pagu a los siervos. Anguañu alcuéntrase n’estáu de desaniciu, faltando toa una ala del mesmu y tando esbarrumbada bona parte d’elli.

Llucía F. Marqués

This work is licensed under a Creative Commons Attribution 4.0 International License.