La participación nesta coallición garantiza la presencia de los asturianos a nivel estatal y européu, al travies d’Andecha Astur, y per ende, aporta una voz propia que represente y defenda los drechos presonales y colleutivos del pueblu asturianu
Esti fin de selmana representantes d’Andecha Astur, Esquerra Republicana de Cataluña, EH Bildu, BNG, Puyalón y Ahora Canarias, aconceyaron pa ultimar los detalles d’un alcuerdu políticu que los los firmantes califiquen d'”hestóricu” y roblar el sopelexu de la coallición Agora Repúbliques.
La coallición allargó la man a toles presones que, dientro l’estáu español, s’enfrenten a la represión y al a involución democrática, defendiendo col so trabayu un modelu “xustu, solidariu, feminista, ecoloxista, antiautoritariu y democráticu”, ufriéndose comu una ferramienta democrática que permita “defender les llibertaes, los drechos nacionales y sociales, y una democracia digna, faciendo frente a la monarquía, y al resurdir de la estrema drecha n´Europa”.
Nel trescursu del actu roblaron el sopelexu públicu ‘Agora la República: la democracia, la llibertá, el drechu’ que recueye el drechu a decidir de los pueblos y l’autodetermín comu ferramienta fundamental p’algamar la soberanía ya’l bientar, al que pueden xunise les organizaciones que lo deseyen y que compartan los principios de democracia, llibertá y respetu a los drechos de los pueblos nelli contenios.
A la firma del documentu asistió una dellegación asturiana ente la que s’atopaba Llucía Fernández, candidata al Congresu y el Secretariu Xeneral d’Andecha Astur, Paulo Arboleya, que firmó’l documentu col que se costituyó oficialmente esta coallición.
SOPELEXU AGORA REPÚBLIQUES
Agora Repúbliques ye una allianza comprometía cola defensa de los drechos sociales (salú, educación, asistencia social, cultur ay vivienda) y llaborales; comprometía con un modelu de sociedá xustu, solidariu, feminista, abiertu, ecoloxista y democráticu, pa defender y conquistar tolos nuesos drechos como presones y como pueblu.
Un modelu de sociedá que dea puxu al texíu productivu ya industurial, l’anovación y el desendolcu, que permita a los xóvenes criar y desendolcar el so propiu futuru y que curie’l presente y futuru de los nuesos mayores. Un mou de sociedá que promueva y garantice la bayura cultural y llingüística de los pueblos; internacionalista y pacifista; que promueva un modelu de desendolcu xustu, y verde, que defenda’l mediu ambiente y lluche escontra’l cambiu climáticu; un modelu de sociedá que nun preslle forntes a los que namás gueten un futuru dignu pa elles y les sos fíes; un modelu de sociedá que combata’l facismu y la xenofobia.
Pola democracia, los drechos y les llibertaes. Pola defensa de los nuesos pueblos y les sos xentes, Agora Repúbliques.
This work is licensed under a Creative Commons Attribution 4.0 International License.
