Los ingresos colos que cunta’l “Principado” a la hora de facer frente a les necesidaes de los asturianos proceden, nun 80%, de la financiación autonómica: más de 3.000 millones que penden del filu de la reforma de la financiación autonómica, plantegada en clave demográfica

Asturies, con pocu más del millón d’habitantes, pierde una docena llarga de pueblos al añu. 269 parroquies cunten con menos de 10 moraores por km cuadráu y 50 nun tienen en censu a naide menor de 15 años. Les polítiques centraliegues lleven a Asturies al anunciáu xenocidiu.

Lloñe d’anunciar midies pa facilitar la vida nos pueblos, crear emplegu y frenar la despoblación, l’executivu asturianu llaméntase del altu coste de garantizar l’asistencia social y los servicios básicos en puntos allonxaos, apuntando a la redución territorial del so ámbetu d’aición que yos facilite’l trabayu y torne definitivamente a más de media Asturies nun ermu. Una política que, ensin dubia, permite un meyor repartu de perres pente collacios, pero que, obviando la llaceria humana qu’implica, tien comu consecuencia económica a mediu plazu un retayu emportante de los ingresos previsibles.

La inminente reforma del modelu de financiación autonómica, de la que dependen más de 3.000 millones d’euros añales -8 de cada diez euros invertios n’Asturies- vendrá determinada pola presión de les provincies más poblaes -y con mayor representación política- del estáu (Madrid, Valencia, Andalucía…) que querrán imponer al so favor el criteriu cuasi esclusivu del númberu d’habitantes pal repartu de los fondos.

La escasa fuercia d’Asturies a la hora d’exercer presión pa que se tengan en cuenta criterios comu l’avieyamientu y la dispersión de la población fae que se dependa de que otros territorios n’asemeyaes circustancies (comu Galicia o Aragón) faigan por inclinar la balanza nesi sen.

Tou ello nun escenariu nel qu’Asturies, que vien de perder otru diputáu, nun cuenta con dengún representante parlamentariu que priorice los intereses asturianos perriba de les directrices madrileñes. Mal pinta.

Llucía F. Marqués

This work is licensed under a Creative Commons Attribution 4.0 International License.