El Colectivu Ecoloxista d’Avilés denunció énte la Conseyería Fomentu’l nuevu arramáu producíu ayeri na ría avilesina, pente la salida del colector nº 5 y el del Niemeyer

Los pasiantes que sollertaron del arramáu declararon qu’en tol tramu afeutáu pudo apreciase un fuerte golor a combustible.

Esti nuevu arramáu, del que nun se pudo comprebar l’orixe, súmase a la llista inacabable d’episodios contaminantes qu’acaben na ría d’Avilés y que tán estropiando’l so ecosistema.

Dende la Coordinadora Ecoloxista demanden que s’identifique l’orixe y los responsables d’esti y de los numberosos arramaos qu’afeuten a esta ría y que se-yos aplique les sanciones correspondientes, d’alcuerdu a la Llei Orgánica 10/1995, al producise una contaminación continua por neglixencia que supón dañu grave pal equilibriu de los sistemes naturales. Recuerden tamién que la normativa europea tien por oxetu la recoyida y tratamientu les agües residuales, cola fin de protexer al mediu ambiente de los efeutos negativos de d’estes agües.

Redaición InfoAsturies

This work is licensed under a Creative Commons Attribution 4.0 International License.