La perda la llingua materna entama en cuantes que tolos estimulos esternos -tele, xuegos, escueles- se dirixen a la reciella n’otra llingua. Entrevistamos a Félix Fernández, d’Acuto Xuegos, que da un pasu alantre pa iguar esti problema, ufriendo a los neños y neñes asturianos la posibilidá de xugar na so llingua

“Casi toos pensamos en qu’esta o aquella cosa taría perbien si tuviera fecha n’asturianu, esperando a que daquien dalgún día la faiga, cuando’l plantegamientu bueno sedría decir ‘esto nun lo hai ya igual podemos facelo nosotros’”.

Preséntanos el vuesu proyeutu… ¿Qué ye Acuto?

Acuto Xuegos ye una iniciativa de calter familiar qu’entamamos la mio pareya, Mamen, y yo. Ñaz tres d’unos meses de da-y vueltes a la idea y de dir buscando la manera de facela viable.

De siempre pensamos qu’había un vaciu pergrande en xuegos n’asturianu pa la reciella. Hai una situación ideal que sedría que neños y neñes crecieren teniendo presencia del asturianu na escuela, na programación de la tele, na música, na ufierta cultural de los conceyos y nos xuegos y xuguetes. Nunos aspectos de mui buena manera n’otros menos tan dándose pasinos en too esto y faltaba qu’entamara a haber una ufierta de xuegos y xuguetes.

Paez una idega enforma evidente… ¿Por qué cuntais que naide nun lo fizo fasta agora?

La cosa igual vien dada de la falta de cultura en xeneral n’Asturies na custión d’emprendimientu, y si en xeneral Asturies nesto ye así, en particular nel asturianismu yelo la falta de creyer en que son posibles proyectos de too tipu cola nuesa llingua como exe. De xuru que casi toos pensamos en qu’esta o aquella cosa taría perbien si tuviera fecha n’asturianu, esperando a que daquien dalgún día la faiga, cuando’l plantegamientu bueno sedría decir ‘esto nun lo hai ya igual podemos facelo nosotros’.

¿Plantegaislo más comu material pa los profesores d’asturianu o cara al usu familiar y l’arruelu caseru?

Nun primer momentu’l nuestru enfotu ye’l del usu familiar y si a la par puede ser útil na escuela taríemos percontentos. A la hora de pensar nos xuegos muévennos dos coses, per un lláu que seyan materiales entreteníos y xugables y per otru que tengan una clara utilidá llingüística, que la reciella xuegue col asturianu en normalidá y de pasu deprenda.

¿Qué xuegos teneis por agora y que otros teneis camentao sacar? 

De momentu asoleyamos El Xuegu de les Pareyes y el Rompecabeces de Les Estaciones del Añu, que son dos xuegos  cenciellinos, xugables y que trabayen vocabulariu d’una manera guapa. Sacamos estos dos xuegos pa ver l’acoyida que tienen y sigún seya facer una valoración y plantegar sacar nuevos xuegos. Too va depender de si vemos si hai demanda o non.

Miremos tamién el tema de los xuegos teunolóxicos, pero d’entamu vímoslo complexu si nun tienes un conocimientu previu que te faiga aforrar recursos económicos, de tiempu y de depender de terceros. Esti asuntu seique seya un buen exemplu de lo que mencionaba enantes de que toos pensamos que taría bien que daquien lo ficiera, poro, animamos a quien pueda tener capacidá pa desendolcar proyectos asina a tirar d’ello, nós taríemos dimpuestos a collaborar na midía que podamos. Pero de momento nosotros nun nos plantegamos entrar ehí.

¿Pa que edaes son afayaizos los vuesos xuegos?

A partir de los 4 años p’alantre, que’l neñu y la neña ya tengan una cierta autonomía pa xugar y consciencia pa saber la llingua qu’usen. Y nesi ‘p’alantre’ nun ponemos techu, si ye viable nun descartamos entamar nel tarrén de xuegos de mesa p’adultos. Pero pasín a pasu. Nel marxen de 0 a 3 años descartamos entrar porque vemos que la utilidá llingüística ye más llimitada y porque la cuestión de la normativa a nivel européu y estatal de la Seguridá de los Xuguetes ye mui estricta pa esta edá, ya ye complexa pal restu d’edaes, cosa que complica muncho la edición de xuegos a pequeña escala, pa 0 a 3 años más, y con razón.

¿Qué acoyía ta teniendo Acuto?

Tamos percontentos con ella, nun sabíamos mui bien como podría entamar y la verdá que tamos percontentos pola cantidá de mensaxes que nos lleguen, pola reacción nes redes sociales y polo que nos diz la xente más cercano. Agora tócanos asentar y ver si un proyectu de facer xuegos y xuguetes n’asturianu ye viable.

¿Onde podemos ver y mercar los vuesos xuegos?

De momentu tamos faciendo la venta online y entamaremos a movenos per dalgunes feries y mercaos. Tenemos dalguna tienda física que ya anunciamos nes redes sociales y si la cosa va p’alantre ya con nuevos materiales buscaremos más tiendes físiques onde distribuyir les coses.

¿Cuntais con dalgún sofitu a nivel oficial?

Non, esto ye de toes una iniciativa que naz con recursos nuestros. Nun tamos en contra de la esistencia d’ayudes públiques, pero tamién creyemos que ye bueno qu’esista iniciativa privada que nun busque qu’ún de lo sos pegoyos seya la sovención.

Gracies y bona suerte.

This work is licensed under a Creative Commons Attribution 4.0 International License.